Personi që shihni në fotografi është Elton Pikli, 32-vjeçari nga Kruja, i cili është i arrestuari i pestë lidhur me grabitjen në Rinas, pasditen e 9 Prillit.
Policia e Shtetit zyrtarizmi këtë të martë arrestimin e tij. Burime zyrtare bënë me dije se 32-vjeçari u vu në pranga në mesnatë.
“Në vijim të veprimeve të kryera nga një grup i posaçëm hetimor për zbardhjen e ngjarjen së datës 09.04.2019 në aeroportin e Rinasit, ju informojmë se mbrëmë në mesnatë është kapur dhe ndalur shtetasi E.P banues në Krujë, i dyshuar si një prej autorëve të kësaj ngjarje. Materialet proceduriale i kaluan Prokurorisë Pranë Gjykatës së Shkallës së Parë për Krime të Rënda Tiranë për veprën penale të ‘Vjedhjes me armë të kryer në bashkëpunim’ në kuadër të ‘Grupit të Strukturuar Kriminal’, ‘mbajtjes pa leje e armëve dhe municioneve luftarake’ “Vrasje e Punonjësve të Policisë “e kryer në bashkëpunim e mbetur në tentativë”, njoftoi Policia.
5 të arrestuar
Përveç Piklit, i cili mësohet se ushtron profesionin si kasap, në pranga janë vënë edhe katër persona të tjerë lidhur me grabitjen, pas së cilës mbeti i vrarë edhe Admir Murataj. Alkond Bengasi, një nga të arrestuarit, doli sot para gjykatës së Krimeve të Rënda ku u njoh me masën e arrestit me burg. Ndërsa të arrestuarit e tjerë, Oltian Veseli, Renaldo Sula dhe Saimir Çela, pritet të dalin para gjykatës për tu njohur me masën e sigurisë, ditën e nesërme. U raportua se Alkond Bengasi u ka treguar hetuesve emrat e bashkëpunëtorëve. /BN/
