“Ata që protestojnë tek Bregu i Lumit dhe tek Unaza e Re nuk janë anëtarë të Partisë Demokratike, por janë njerëz që preken nga projekte abuzive dhe nuk dëmshpërblehen për pronat e tyre”, deklaroi ish-deputetja e Partisë Demokratike Albana Vokshi në studion e emisionit “Natë më Xhaxhiun”.
Vokshi argumentoi se ata që shprehin pakënaqësinë ndaj mënyrës se si po qeveris Edi Rama nuk janë vetëm anëtarë të PD-së, por qytetarë të ndryshëm të vendit që nuk i besojnë më kësaj qeverie.
“Sondazhet tregojnë se opozita është në rritje sa i përket mbështetjes së qytetarëvë dhe kjo jo nisur nga sondazhet e opozitës”, tha Vokshi në Fax News.
Duke folur për raportin e opozitës me ambasadorët, Vokshi tha: “Ne asnjëherë nuk kemi flirtuar as me një ambasador, as me dy ambasdador. Ne kemi pasur takime zyrtare me ta dhe shumica kanë qenë publike. Me ta është diskutuar për rrezikun e kalimit të vendit nga demokracia në një diktaturë. Unë nuk besoj se ju prisnit që të thonin se keni bërë mirë me djegien e mandateve, por ju garantoj se në çdo takim me anëtarët e PD na thonin, pse shkoni ju në Parlament? A po na mbroni ju interesat tona në Parlament? Nëse një anëtar i kabinetit të refuzon në Komisionin Parlamentar, nëse asnjë amendament nuk na pranohet nga qeveria, për çfarë duhet të qëndronim.
Unë kam pasur prej dy ministrave tetë herë refuzime për të marrë pjesë në Komision gjatë kohës që e drejtoja. Kam dërguar dhjetra shkresa dhe asnjë përgjigje nga qeveria. Dhe e fundit që i vuri vulën, kur u ndryshua qeveria nuk na dhanë fjalën për të folur për qeverinë e re që krijoi Rama në dhjetor”, deklaroi Vokshi.
Ndërkohë për lëvizjet e ditëve të fundit të deputetes së zgjedhur nga radhët e PD-së, Rudina Hajdarit, Vokshi u tregua e drejtëpërdrejtë dhe nuk i kurseu as disa kritika si dhe ngriti disa pikëpyetje.
“Nuk di në është e vërtetë, ngjan si një telenovelë. Njëherë thanë se do të krijohej me këtë emër, me këta përsona, pastaj me ate emer e me ata persona etj. Ajo çfarë mund të them është se çdo krijim i një partie që siguron të mbrojë kauzën opozitare nuk i shërben momentalisht interesit të vendit. Për aq kohë sa mbetet në kuadrin e telenovelave, më shumë se aq nuk mund të themi përveçse i vjen në ndihmë Edi Ramës, nuk themi dot që është paguar nga ai apo është urdhëruar nga ai, sepse duhet të kemi prova për ta faktuar por di të them se në këtë mënyrë i shërben atij”
Më tej Vokshi shtoi: “Nuk besoj se Hajdari është një fenomen, Azem Hajdari ka qenë ndër opozitarët e parë dhe të palëkundur në mbrojtjen e vlerave të demokracisë. Ndërsa kjo nuk di çfarë don dhe çfarë përfaqëson. Ajo nuk ka qenë anëtare e PD-së. Elektorati i njësisë ku ajo ka qenë e deleguar në zonën e Laprakës nga PD-ja kanë qenë të zemëruar dhe të zhgënjyer, sepse i ka dhënë besimin si përfaqësuese e PD. E para ajo nuk përfaqëson Partinë Demokratike dhe nuk përfaqëson elektoratin. Se kë përfaqëson do ta shohim në vijim. Di që është diplomuar në një nga universitetet më të mira amerikane, është një person me ekperiencë dhe trajnime dhe besoja se me një eksperiencë të tillë do të sillte pozitivitet dhe një frymë të re”.
