Një vrasje e trefishtë ka ndodhur gjatë ditës së sotme në lagjen “Dardania” në Prishtinë nga ku një person vrau gruan e tij, gruan e djalit e më vonë vrau edhe veten.
Fillimisht u raportua se shtetasi me inicialet H.K., kishte vrarë gruan e djalit dhe më pas vetën, por më vonë u mësua se viktimë për shkak të konfliktit kishte mbetur edhe bashkëshortja e tij.
Ndërkohë mësohet se e pranishme në vendin e krimit ka qenë edhe mbesa 2-vjeçare e cila ka parë të gjithë ngjarjen.
Rastin e ka konfirmuar kryeprokurori i Prokurorisë Themelore në Prishtinë Imer Beka.
“Po kemi marrë informacion që dy persona kanë ndërruar jetë. Sipas informacioneve të para dyshohet se një person ka vrarë gruan e djalit të tij dhe më pas ka vrarë edhe veten”, ka bërë të ditur Beka.
Prokurori momentalisht është duke shkuar në vend të ngjarjes, raporton Express.
Ndërkohë mësohet se është nxjerrë nga banesa ku ndodhi vrasja e trefishtë në Prishtinë, vajza dy vjeçare që është personi i vetëm që mbeti i gjallë nga ngjarja tragjike ku mbetën të vdekur tre persona, raporton Gazeta Express.
Dy orë pasi ndodhi krimi, 2-vjeçarja është nxjerrë nga aty nga familjarët pasi hetuesia realizoi hetimet e para.
Vajza ishte në vendin e ngjarjes kur ndodhi rasti tragjik, ku H.K vrau gruan e tij, gruan e djalit e më vonë vrau edhe veten.
Rastin e kanë konfirmuar edhe në Policinë e Kosovës.
“Sot rreth orës 13:20, policia ka marrë informacionin për një vdekje të dyshimtë në rrugën “Bill Klinton” në Prishtinë. Menjëherë pas marrjes së këtij informacioni në vendin e ngjarjes kanë dalë të gjitha njësitë e nevojshme policore. Nga informacionet e para në vendin e ngjarjes dyshohet se nga arma e zjarrit janë vrarë tre persona. Vdekjen e viktimave e ka konstatuar ekipi mjekësor në vendngjarje. Aktualisht njësitë policore janë duke punuar në sqarimin e të gjitha rrethanave që kanë të bëjnë me rastin”, ka bërë të ditur Flora Ahmeti.
Mësohet se personi që kreu krimin prej kohësh kishte probleme mendore, i cili edhe një vit më parë kishte tentuar të vriste gruan e tij.
