Më anë të një letre të adresuar në redaksinë e “Panorama Online”, Luan Rama thekson se nuk kishte qëllim të tallej me deputeten, por pasi e kishte dëgjuar disa herë fjalimin e Hajdarit, vendosi të kërkojë ndihmë.
Letra e plotë e Luan Ramës
Kërkova ndihmë të kuptoja kumtin e deputetes së nderuar, nuk u talla me të!
Të nderuar kolegë të “Panoramës”!
Në respekt të plotë për profesionalizmin tuaj të admirueshëm, për korrektesën dhe etikën shembullore, me lejoni t’ju drejtohem miqësisht me sqarimin në vijim, imponuar nga titulli me të cilin ju keni publikuar një status që unë kam ndarë pa asnjë koment a interpretim me miqtë në profilin tim privat në fb.
Më konkretisht, titulli i zgjedhur prej jush është: ““Lidere e opozitës parlamentare…”, Luan Rama tallet me Rudina Hajdarin, i nxjerr videon dhe kërkon ndihmë: A mundet ndokush ta shqipërojë…”
Më lejoni miqësisht t’ju them se ka një deformim në lidhje me sa unë kam shkruar për fjalën e Rudina Hajdarit në Parlament, dhe për fat të keq, ka edhe një “spekullim”.
Sepse unë nuk jam tallur me deputeten e nderuar, pasi nuk e kam në natyrë të tallem me ndokënd. Aq më pak denjoj e guxoj të tallem me bartës vlerash përfaqësimi që janë edhe partnerë të faktorit ndërkombëtar në Shqipëri.
Unë, pasi e dëgjova disa herë me shumë vëmendje fjalën e deputetes së nderuar, u përpoqa ta kuptoj, e meqë nuk ia dola ta kuptoj, kërkova ndihmë pa asnjë nëntekst, që dikush të mund t’a shqipëronte ligjërimin e saj, që edhe unë ta kuptoja kumtin politik të zonjës në fjalë! Sepse në fund të fundit, gjithkush që flet a kumton publikisht e politikisht, synim të parë ka që të tjerët ta kuptojnë. Se përndryshe, përse e për kë flet?
Të mos kuptosh nuk është mëkat, e për një gjë që nuk e kupton të kërkosh ndihmë nga cilido që mund të të ndihmojë, është krejt normale. Për më tepër, nuk është tallje.
Ma do mendja që edhe ju të nderuar kolegë, ndani të njëjtin mendim me mua për këtë çështje.
Ndaj ju lutem, mirëkuptomëni dhe nëse mundeni, korrektojeni titullin e shkrimit.
Me shumë respekt për ju dhe lexuesit tuaj,
Luan Rama
