Situata e Skënderbeut në gjyqin me UEFA-n ka dalë disi jashtë planeve. Jo se kanë më shumë apo më pak shanse të fitojnë në KAS, por sepse koha e pritjes do të jetë me e gjatë sesa një muaj. Ose më saktë, nuk ka një datë fikse për të marrë fund ankthi i pritjes…
Ka qenë vetë klubi korçar që nëpërmjet një komunikate për mediat ka bërë publike letrën e zyrës ligjore zvicerane që mbron Skënderbeun në Gjykatën e Arbitrazhit Sportiv. Në dukje ishte një komunikatë formale, por mes rreshtave thuhej se “vendimi do të publikohet në muajt e ardhshëm”. E pra, muajt, jo muajit të ardhshëm. Kjo, përveçse shton stresin për korçarët që janë duke luftuar fuqishëm për një vend në Europë, bën lëmsh edhe klubet e tjera.
Supozojmë: nëse Skënderbeu siguron vendin e tretë, apo nëse fiton Kupën e Shqipërisë, por përgjigjja del me vonesë ose nëse është negative, kush shkon në Europë? Si duhet t’i bëjnë llogaritë klubet shqiptare në këtë rast (Kukësi, Teuta, Tirana, Laçi, Flamurtari dhe Luftëtari)? Përveç faktit që pjesa më e madhe e këtyre klubeve nuk e dinë nëse do të marrin apo jo licencimin për të luajtur në Europë, tani shtohet edhe një tjetër hall: çfarë do të ndodhë me Skënderbeun…?
VARIANTET
Nëse Skënderbeu siguron një vend në Europë dhe përgjigjja vonohet nga KAS, por është pozitive, pra Skënderbeut i hiqet dënimi 10-vjeçar, atëherë e sigurt është se do të rritet edhe dëmshpërblimi për korçarët nga UEFA. Nëse përgjigjja vjen, por është negative, atëherë kjo pa dyshim rrit kostot e Skënderbeut.
Në rastin e dytë, pra nëse korçarët kanë siguruar deri në fund të sezonit një vend në Europë si fitues të Kupës, por mbeten të dënuar, atëherë në vend të tyre do të shkonte vendi i katërt. Nëse e sigurojnë një vend në Europë nëpërmjet kampionatit, por përgjigjja nga KAS-i është negative, atëherë vendin e tyre do ta zinte skuadra më poshtë në renditje.
REAGIMI
Pas seancës dëgjimore të martën në KAS, klubi i Skënderbeut ka dalë në një komunikatë zyrtare, ku publikon edhe letrën që studioja ligjore i ka dërguar presidentit Ardjan Takaj. “I dashur zoti Takaj. Mund të konfirmojmë për KS Skënderbeu se çështja e KS Skënderbeut kundër UEFA-s, u dëgjua më 16 prill 2019 nga Gjykata e Arbitrazhit Sportiv në Lozanë.
KAS do pasqyrojë vendimin në muajt e ardhshëm. Ju mund ta publikoni këtë në mediat zyrtare – ky informacion është publik dhe në interes të publikut”, shkruhet në letrën e studios ligjore zvicerane, “De PFYFER”, përfaqësuar nga avokati ZhanSedrik Mishel. Ndërkohë, klubi i Skënderbeut shprehet se për momentin vetëm kaq mund të publikojë për tifozët, ndërsa shpreson për rezultatin më të mirë nga ky gjyq.
“Të dashur sportdashës dhe tifozë. Në përgjigje të interesit tuaj mbi çështjen që po zhvillohet në Gjykatën e Arbitrazhit Sportiv po publikojmë letrën zyrtare të zyrës ligjorë që po mbron interesat e klubit. Ky është i vetmi informacion që mund të bëjmë publik momentalisht. Lutemi të mos bini pre e aludimeve dhe lajmeve pa fund mbi çështjen në fjalë. Shpresojmë për më të mirën”, thuhej në komunikatën e klubit.//PanoramaSport
