Nga Boldnews.al
Nëntë ditë pas grabitjes së bujshme në pistën e Aeroportit të Rinasit, në barkun e avionit me 104 pasagjerë në bord, ku pesë persona të armatosur thyen çdo “siguri” të brendshme dhe të jashtme, duke rrëmbyer miliona euro, ka reaguar në Parlament edhe ministri i Brendshëm Sandër Lleshaj. Ministri tha se diku tek 5 milionë euro u grabitën dhe jo 10, duke i dhënë ngjarjes doza relative.
Po me aq sportivitet gjenerali e mori edhe alarmin e madh se siguria në zonën që duhet të jetë më e sigurtë ka munguar, e për më shumë askush nuk garanton se krime të tilla nuk do të përsëriten më.
“Nuk është një ngjarje apokaliptike, siguria e vendit nuk cënohet nga një grup prej 5 vetësh të armatosur”’deklaroi Lleshaj në senacën Parlamentare i thirrur në interpelancë për t’i bërë “nder” nga një grup deputetësh të opozitës së re.
Përgjatë gjithë kohës, Lleshaj fajin ia kaloi kompanisë kineze që ka marrë me konçension administrimin e Aeroportit të Rinasit. Shpesh përsëriti fjalët: “Policia siguron perimetrin e jashtëm të Aeroportit”. Deklarata e ministrit që tregon forcën me gra e fëmijë që mbrojnë banesat e tyre, përveçse groteske është edhe më alarmante se vetë ngjarja e 9 prillit në Rinas. Përderisa policia “siguron” perimetrin e jashtëm, po grabitësit nga hynë?
Të pesë personat e armatosur u futën nga jashtë Aeroportit, kaluan nën hundën e policisë, shqyen dyert të qetë, kryen grabitjen e bujshme dhe dolën, në itinerarin: “jashtë-brenda-jashtë…”!
Ministri me përgatitje ushtarake, e ka të qartë se kur thuhet se sigurohet një perimetër i jashtëm, nënkupton se çdo element që përbën rrezik, nuk lejohet që të futet në brendësi të një institucioni të rëndësisë së veçantë.
Sot sërish Lleshaj shigjetoi kompaninë kineze, faji sipas tij është gjithnjë jashtë Rilindjes së tij. Në këtë rast gjetën armikun e jashtëm kinez si problem të brendshëm. Gjithçka nuk funksionoi në ngjarjen e 9 prillit për strukturat shtetërore.
Grabitësit nuk desantuan si në kohën kur Lleshaj e kujton me nostalgji. Nuk u hodhën me parashutë nga ari në pistën e avionit, por thyen dy herë sigurinë e jashtme, atë që Lleshaj e konfirmon se ruhej nga policia.
Në përpjekje për të mbrojtur një skandal të madh qeveritar që thjesht konfirmoi se siguria në vend mungon, gjenerali i Rilindjes po i ngjan “gazetareve” të ER TV, (Edi Rama televizion), që recitojnë skenarin e përgatitur më parë nga zyra e kryeministrisë.
