Pas ndeshjes së fituar me Kastriotin, trajneri i Skënderbeut ka folur pa rezerva në lidhje me atë çka pritet të ndodhë në ditët në vijim për sa i përket ekipit të tij.
Trajneri Orges Shehi krejt ndryshe nga të tjerët ka folur për lajmin e madh për Skënderbeun europian. Rikthimi i Skënderbeut në Europë edhe për Shehin është mjaft i rëndësishëm për të gjithë futbollin shqiptar.
“Është koha që të përcaktohet gjithçka. Drejtuesit e klubit kanë shkuar atje dhe ne jemi duke pritur që të kthehen me lajmin e madh. Kur them lajmin e madh, do të thotë që drejtësia të vihet në vend. Që do të thotë se Skënderbeu do të rikthehet atje ku ka qenë dhe duke mbyllur të gjitha këto që kanë bezdisur mjaft këtë ambient në këto vite. Rikthehet Skënderbeu europian nëse drejtësia vihet në vend dhe ikin të gjitha paragjykimet që i janë bërë me pa të drejtë këtij ekipi. Kjo është e gjitha.
Ne jemi këtu për të bërë lavdinë e këtij ekipi. Ka pak rëndësi nëse Shehi është trajner i ekipit apo dikush tjetër. Skënderbeu duhet të kthehet atje ku ka qenë dhe ku meriton. Unë nuk e kam me tapi këtë vend, por kam 9 vite këtu dhe jam pjesë e familjes. Për këtë e them që me mua apo pa mua vendi i Skënderbeut është në Europë”, përfundoi trajneri i Skënderbeut, Orges Shehi, në lidhje me çështjen në KAS.
