Skënderbeu-Kastrioti prodhoi gjithçka në fushë, por edhe në tribunë. Edhe pse në stadium nuk ishin më shumë se 1400 tifozë, zhurma nuk mungoi. Dhe duhet thënë që më të zellshëm ishin miqtë e ardhur nga Kurja, të cilët ndonëse 50 vetë, ndiheshin më shumë se vendësit dhe kryesisht me ofendimet në kor. Gjithsesi, një atmosferë e vakët në kompleks. Mungesa e tifozëve bardhekuq vijon të jetë prezente te korçarët që janë në “krizë” rezultatesh.
– Ardjan Takaj dhe “enturazhi” i tij nuk kanë munguar në këtë sfidë. Në krahë të presidentit ishte Boshku, si edhe kryebashkiaku Sotiraq Filo. Nga ana tjetër, edhe drejtuesit e klubit krutan ishin prezentë në tribunën VIP, duke dhënë herë pas here këshillat e tyre për ekipin, por edhe trajnerit Devolli.
– Trajneri i Skënderbeut ka qenë gjatë 90 minutave në këmbë duke udhëzuar ekipin e tij në çdo moment. Shehi fillimisht ka udhëzuar mesfushën për të qenë më pranë lojtarëve të sulmit dhe për të diktuar lojën e vet karshi kundërshtarit.
– Devolli në anën tjetër i përgjigjej me udhëzimin e prapavijës, për të qenë më të vëmendshëm për aksionet pas shpine, pasi sipas tij lojtarët e shpejtë të Skënderbeut mund të hapnin probleme. Më këtë “porosi” të Devollit, krutanët u ndëshkuan dhe trajneri shpërtheu në kontestime për të tijtë. “Ua thashë mijëra herë që të kishin kujdes”, dëgjohej trajneri.
-Bledar Devolli ishte njeriu më i kontestuar nga tifozët bardhekuq. E gjithë tribuna pas stolit të Kastriotit nuk ka heshtur një moment, duke komentuar çdo reagim që bënte gjirokastriti. Ka pasur edhe nga ata që i kanë kujtuar se është duke luajtur me kampionin në fuqi. “O Devolli, nuk jemi në Krujë këtu. Je në Korçë, po luan me kampionët”, ishin thirrjet nga tribuna A e stadiumit.
– Në anën tjetër, kanë qenë diçka më shumë se 50 tifozë krutanë në Korçë. Pavarësisht se ekipi i tyre po humbte, krutanët nuk kanë pushuar nga thirrjet në korr, të cilat ishin realisht ofenduese. Kristi Vangjeli ka qenë më i kontestuar i rastit, pasi përgjatë 90 minutave është ofenduar pa fund nga tifozët miq. Por, për çudi arbitrat në asnjë moment nuk vendosën që të ndalnin lojën.
– Gjetje e tifozëve miq për të çuar në majë nervat e korçarëve. Në momente të caktuara, krutanët thërrisnin në kor emrin e Partizanit duke bërë që stadiumi të irritohej pa fund.
– Goli i dytë ka qenë ai që i ka dhënë qetësinë Skënderbeut, madje edhe trajneri u pa duke festuar në maksimum. Oto Xhon ka çuar peshë stolin bardhekuq, ku Shehi ka gëzuar me të gjithë.
– Protokolli i ndeshjes së ditës së djeshme është vonuar në limite për gazetarët. Kjo, pasi Bledar Devolli ka preferuar të ndjekë nxehmjen e ekipit për të vendosur se kush do të hyjë në fushë si titullar. Fillimisht ishte menduar që të luante Bojom, por duket se nuk është rikuperuar plotësisht dhe për rrjedhojë u fut Okebuku.
/PANORAMASPORT.AL/
