Humbja me Partizanin i ka futur në një vorbull mjaft të rrezikshme për sa i përket luftës për verdiktet e sezonit të ri. Në kuotën e 40 pikëve, korçarët ende nuk e kanë siguruar qëndrimin mes më të mirave në kampionat, teksa nga ana e vet pretendon pjesëmarrjen në Europë.
Në kushtet kur ndeshja me Kastriotin do të jetë përcaktuese për sa i përket rrezikut që i kanoset Skënderbeut, korçarët duhet të bëjnë kthesën e madhe jo vetëm në lojë, por edhe në kampionat. Për ish-sulmuesin e ekipit bardhekuq, Dhimitraq Xhambazi, Skënderbeu po kalon ndoshta momentin më të keq nga 10 vitet e fundit, por nuk është në kushtet për të luftuar për mbijetesë.
Xhambazi fillimisht është ndalur te humbja me Partizanin në kryeqytet, duke e cilësuar një lojë jo të denjë për Skënderbeun atë të treguar në këtë takim. “Të jemi të sinqertë, Skënderbeu nuk tregoi asgjë nga potenciali i vet në ndeshjen me Partizanin. Pavarësisht se është një ndeshje ku ia vlen të ndalesh për të gjykuar penalltinë e dhënë për Partizanin dhe atë të mohuar ndaj Skënderbeut, mund të themi se ekipi nuk tregoi dëshirë për të fituar këtë takim.
Në 90 minuta një ekip që pretendon shumë nuk mund t’i lejojë vetes të bëjë një goditje në kuadrat. Për këtë arsye them se me lojën e bërë Skënderbeu nuk meritonte më shumë. Por, ajo që na shqetëson të gjithëve janë rezultatet negative të ekipit. Në momentin kur të gjithë presin kthesën, Skënderbeu rrëzohet dhe nuk arrin të ketë vijimësi”, theksoi fillimisht Xhambazi për “Panorama Sport”.
RREZIKU MBIJETESË
I pyetur për rrezikun që i kanoset ekipit në prag të luftës për mbijetesë, Xhambazi shprehet i bindur se korçarët nuk janë në nivelet për të vënë në dilemë mbijetesën. Përkundrazi, sipas tij, Skënderbeu këtë sezon arrin të renditet mes ekipeve që garantojnë pjesëmarrjen në Europë.
“Le të mos e ekzagjerojmë. Vërtet ekipi nuk e ka siguruar matematikisht mbijetesën, por nuk besoj se niveli i Skënderbeut mund të jetë i tillë sa të listohet në ekipet që rrezikojnë rënie nga kategoria. Ndeshja e ardhshme në Korçë është e një rëndësie të veçantë përballë Kastriotit. Por, kurrsesi nuk mund të vëmë në diskutim forcën dhe aftësitë e ekipit. Jam i mendimit se Skënderbeu, pavarësisht luhatjeve, nuk e diskuton këtë pikë që prekët ju. Me bindje mund të them se ky ekip arrin Kupat e Europës, pasi mundësitë i ka reale”, tha Xhambazi në lidhje me objektivat e korçarëve.
Së fundi, ishgoleadori korçar u ndal edhe te çështja e shumëpërfolur e KAS-it duke e mbyllur me një lutje. “Mbyllja e kësaj çështjeje do t’i bëjë mirë jo vetëm Skënderbeut, por edhe futbollit shqiptar në tërësi. Unë i qëndroj besnik atij tubimi madhështor. Skënderbeu është totalisht i pafajshëm dhe gjithçka do e zbardhë drejtësia”, mbylli Xhambazi.
