Nga Malcolm Y
Gent Baton Çaka, i quajtur ndryshe gjeniu filozof, e nisi aktivitetin e tij diplomatik me show, në modelin më të arrirë fasadist të mundshëm. Ndonëse çilimi-diplomacia e tij dështoi qysh në ditët e para, ku gjuha e trupit të ministrit riosh dhe të pamësuar, tregonte qartazi inferioritet të dukshëm përballë homologëve në NATO dhe BE, kjo nuk e ndaloi as të provonte të recitonte, mjaft keq duhet thënë, rilindasin e vërtetë, poetin kombëtar Naim Frashëri në samitin-fasadë të diasporës. Një ministër që nuk përballon dot një argument, që nuk ka sadopak një koncept, që në librezë ka vetëm pak muaj punë nën hyqmën e kryetimonierit Rama, i katapultuar kushedi për ç’meritë të Baton protektorit.
Ministri i jashtëm duket se e ka marrë me bujë dhe rropujë detyrën e re pa kuptuar qartazi targat që i jep ligji por duket dëgjuar vetëm ç’i thotë Maliqi. Javën që shkoi doli në mënyrë të paprecedentë si të ishte shef i kuadrit në Ministri dhe njoftoi lëvizje personeli, pa emra por thjesht për skup. I ngrohur nga vëmendja, i ledhatuar nga sedra dhe nën mbikëqyrjen e Fuga-regjisë, e pasoi me një vendim të çuditshëm të heqjes së targave diplomatike, a thua ishte çubardhi i Ministrisë së Brendshme. Çka është më e pafalshme, është se në deklaratën shoqëruese tregoi qartazi që nuk i’a ka haberin as detyrës që i kanë lënë kalaqafë, as vendit ku po shërben. Ende nuk e kishte marrë vesh që liberalizimi i vizave ka ndodhur qysh në 2010-ën, pra kanë kaluar nëntë vjet dhe ministri në detyrë ende nuk di gjë?!
Spin-i i përhershëm i fasadë-qeverisë përpiqet t’i vërë në gjuhë fjalë që ministri riosh dhe filozof as nuk i ka menduar, jo më t’i shqiptojë përballë Daçiç në forume ndërkombëtare. Ministri pa CV të publikuar, i pavotuar, pa librezë pune, me shqipe sakate, euforik dhe plot delir, një kopje e zbehtë e shefit të gjatë, ende duket i pamësuar korridoreve të politikës dhe diplomacisë. Në retorikë, gjuhë trupi, praktikë diplomatike, nocione të së drejtës ndërkombëtare, njohje të problematikës me fqinjët, si për shembull marrëdhëniet komplekse me Greqinë, ministri-fëmijë ende vërtitet lumturisht në botën e çudirave.
I gëzohet lodrës së re në një vend që nuk ka luksin të humbasë një sekondë në eksperimente kohë-bjerrëse dhe ku burimet njerëzore janë ndoshta të vetmet asete që mund të përdorte efektivisht për të promovuar vendin në arenën ndërkombëtare, përmirësuar imazhin dhe arritur suksese të prekshme si hapja e negociatave që janë së paku me pesë vjet vonesë. Por në një vend ku shitet sapuni për djathë, dhe forma është dukshëm më e rëndësishme se përmbajtja, nuk është habi që edhe Genti faqekuq i datëlindjes 1990 të jetë zotërues i 5 diplomave, nga të cilat 1 master dhe 2 Bachelor brenda 3 vitesh. Edhe ata që i ka zënë efekti i miellit të Batonit, nuk mund t’i hanë rrena kaq të trasha të shitura ditën për diell. Vetëm qëndrestarët pensionistë dhe rilindasit më të dedikuar, mund t’i besojnë 99-çave më të sofistikuar.
