Peshëngritësi shqiptar, Briken Calja, arriti një rezultat të madh në Kampionatin Europian të Peshëngritjes “Batumi 2019”, që u mbajt në Gjeorgji.
29-vjeçari nga Elbasani, fitoi medaljen e artë në stilin e shkëputjes në peshën deri në 73 kilogramë, ndërkohë që mori të argjendtën në shtytje, si dhe u shpall nënkampion Europe në dygarësh.
Ditën e sotme, ekipi i peshëngritësve kuqezinj u kthyen nga Gjeorgjia, dhe një grup i madh miqsh dhe tifozësh kishin dalë në aeroportin “Nënë Tereza” për ta pritur nënkampionin e Europës, duke e çuar edhe peshë.
Ndërkohë, një karvan i gjatë me makina, me flamuj kuqezi mbi to, u rreshtua në rrugën nga Tirana në Elbasan, dhe një video të këtyre emocioneve fantastike vetë Briken Calja e ka postuar në Facebook, nga tuneli i Elbasanit.
