Agjencia e Barnave njofton përmes Facebook se shurupi i përdorur gjerësisht Postan është i ndaluar të përdoret, për shkak të tejkalimit të nivelit të lejuar të plumbit dhe Lithiumit. Agjencia e ka bërë njoftimin në rrjetet sociale, duke harruar që ky shurup është një nga më të përdorurit në masë nga fëmijët. Shkak për ndalimin është tejkalimi i niveleve të lejuara të plumbit dhe lithiumit.
Reagimi i plotë:
Agjencia Kombëtare e Barnave dhe Pajisjeve Mjekësore bën me dije se pas njoftimit të marrë nga MAH (prodhuesi) dhe distributori farmaceutik, të cilët importojnë barin “Ponstan shurup 50mg/ml”, ka nisur tërheqja e tij nga tregu si pasojë e tejkalimit të niveleve të ekspozimit ditor të lejuar për Plumb dhe Lithium.
Aktualisht, ka nisur kthimi i sasisë stock nga të gjithë distributorët farmaceutikë dhe farmacitë e rrjetit të hapur në ambientet e distributorit të autorizuar, deri në datën 30 prill 2019. Farmacistët që hasin përshkrimin e këtij bari përgjatë këtyre ditëve, lutemi të mos e ofrojnë ndaj pacientëve, duke u kërkuar këtyre të fundit rikonsultim me mjekun për alternativa të tjera.
Njoftimi i Agjencisë është bërë për qytetarët përmes rrjeteve sociale, dhe nuk ka ende një informacion të detajuar se me çfarë zëvendësohet ky ilaç.
