Nga Boldnews.al
Prokurorit Kolë Hysenaj i mjaftuan vetëm 15 muaj drejtues në Prokurorinë e Korçës për t’u “dashuruar” me qytetin jug-lindor e për të ngritur atje sarajet e tij.
Hysenaj rezulton të jetë një nga prokurorët më të pasur të Shqipërisë dhe është në pritje të procesit të Vetingut. Të ardhurat e tij kanë si burim vetëm pagën dhe fitimet minimale nga një bar-kafe rreth 30 m2, me 7-8 tavolina, në të cilët klientët ulën për kafe, e gjendur pranë Prokurorisë së Tiranës.
Por, këto të ardhura i kanë lejuar prokurorit të Tiranës që të krijojë pasuri disa qindra-mijëra euro.
“Boldnews.al” ka siguruar disa foto, në të cilat dallohet prona e prokurorit Hysenaj, shumë pranë qendrës së Korçës, vlera e të cilës e rikonstruktuar sipas ekspertëve të fushës, kap vlerën e rreth 500 mijë eurove.
Por, prokurori Hysenaj deklaron se e ka blerë atë pronë me vlerë 125 mijë euro. Në deklaratën e pasurisë për vitin 2016, dorëzuar pranë Inspektoratit të Deklarimit të Pasurive, prokurori Hysenaj shënon se ka blerë dy pasuri të paluajtshme, në vlerë totale 125 mijë euro.
Burimi i blerjes së këtyre pasurive, sipas vetëdeklarimit, janë të ardhurat e krijuara nga disa transaksione të mëparshme me tokat në Tiranë, si edhe një kredi. Me blerjen e kësaj pasurie, prokurori Hysenaj deklaronte se kishte shpenzuar të gjithë kursimet e krijuara nga paga e tij dhe të ardhurat e lokalit të vogël.
“Boldnews.al” ka siguruar fotot e objektit të blerë nga Hysenaj në vitin 2016. Është një ndërtesë e vjetër, por e vendosur në një zonë shumë të lakmuar të qytetit të Korçës, në të cilën gjenden disa prej bujtinave më të famshme në Shqipëri.
Pasi kjo ndërtesë dhe trualli i saj bëhen pronë e prokurorit Kolë Hysenaj, ajo, si një “Hirushe” e vërtetë, pëson një transformim të plotë. Sot, prona e prokurorit Hysenaj është një ndër më të bukurat në zonën përreth. Natyrisht, vlera e investimit në atë objekt duhet të kapë shifrën e disa qindra mijëra euro.
Por, prokurori Hysenaj nuk ka pasur më kursime për të realizuar investimin, pasi gjithçka kishte i shpenzoi për blerjen e pronës. Natyrisht, ai do të duhet të japë llogari para Vetingut për pasurinë e tij.
Por, edhe publiku është i interesuar të dijë të vërtetën e pasurimit të këtij prokurori, i cili, në vetëm një vit e gjysëm drejtues në Korçë u shndërrua në pronar të fuqishëm ndërtese.
“Boldnews.al” po sjell fotot, në të cilat dallohet lehtësisht ndryshimi i objektit nga momenti i blerjes prej prokurorit Kolë Hysenaj, në vitin 2016, deri në ditët e sotme. Krahasimi nuk ka nevojë për asnjë koment.
Ndërtesa, sapo kaloi në pronësi të prokurorit Kolë Hysenaj, u shndërrua në “saraje”. Kolë Hysenaj është një prej prokurorëve, i cili akuzohet më shpesh nga qytetarët për përfshirje në korrupsion.
“Boldnews.al” i ka siguruar fotot e “sarajeve” të Kolë Hysenaj nga denoncimet qytetare. Banorë të Korçës dëshmojnë për veprime të shumta korruptive të tij gjatë kohës që drejtonte Prokurorinë e qytetit jug-lindor.
Siç duket, këto denoncime të shumta, të mbërritura edhe në adresë të komisionerëve të Vetingut dhe të vëzhguesve ndërkombëtarë, e kanë “detyruar” Kolë Hysenajn që të shndërrohet në një “vartës” të qeverisë.
Ai, siç duket, shpreson tek “mëshira” qeveritare për t’a kaluar pa probleme Vetingun. Dhe, në këmbim, Kolë Hysenaj ka vendosur të plotësojë kërkesat e qeverisë, siç veproi edhe në rastin e dosjes “Babale”, ku mori nën akuzë personat që denoncuan përfshirjen në trafik narkotikësh të Agron (Geron) Xhafaj, vëllait të ish-ministrit të Brendshëm, Fatmir Xhafaj.
