Analiza daktiloskopike e mbërritur nga Greqia provoi zyrtarisht përmes gjurmëve të gishtave se personi që mbeti i vrarë pas grabitjes në Rinas, ishte 47- vjeçari nga Tropoja, Admir Murataj.
Pas identifikimit të tij nga bashkëshortja dhe vëllai, identiteti i tij u vulos përfundimisht, duke lejuar tërheqjen e trupit nga morgu.
Pas përfundimit të autopsisë, familjarët tërhoqën dje trupin e 47-vjeçarit dhe menjëherë u nisën në drejtim të fshatit Çerem të Tropojës, që është edhe vendlindja e tij, ku do të zhvillohen pritjet për ngushëllim, si dhe ceremonia mortore.
Vëllai i tij Cen Murataj dhe bashkëshortja e të ndjerit ishin bashkë me familjarë të tjerë, teksa tërhoqën trupin nga Instituti i Mjekësisë Ligjore. Të afërmit e Muratajt treguan dje se varrimi do të bëhet sot në orën 12:00 në fshatin e tij të lindjes.
IDENTIFIKIMI
Emri i Admir Muratajt, si personi që mbeti i vrarë gjatë grabitjes, doli në skenë pasditen e së martës, fillimisht nga mediat greke. Sipas gazetës “Protothema”, personi i vrarë me armë zjarri nga Policia në Rinas ishte arratisur nga burgu grek i Trikallas në vitin 2013, së bashku me 10 kriminelë të tjerë të rrezikshëm shqiptarë, disa prej të cilëve janë arrestuar në Shqipëri.
Nisur nga këto lajme, që më pas u publikuan edhe nga mediat vendëse, bashkëshortja e Admir Muratajt u paraqit vetë dy ditë më parë te Drejtoria e Policisë së Tiranës që në orët e para të mëngjesit, që të interesohej për saktësinë e këtyre informacioneve.
Kur nuk kishte arritur të komunikonte me bashkëshortin, Albana Murataj, edhe pse askush nga Policia s’e kishte thirrur apo t’i shkonte në shtëpi për ta pyetur, vendosi të shkonte vetë në Polici. Pasi nuk mori përgjigjen që kërkonte aty, ajo u drejtua për tek Instituti i Mjekësisë Ligjore, në Qendrën Spitalore “Nënë Tereza”.
E shoqëruar nga vëllai i Admirit dhe shumë familjarë të tjerë, ajo u fut vetë në morg për të identifikuar personin që kishte mbetur i vrarë të martën. Pas disa minutash, ajo doli duke qarë nga ambientet e morgut dhe që nga ky moment u kuptua se e kishte identifikuar viktimën dhe se ai ishte pikërisht Admir Murataj. Vetë Albana nuk foli për asnjë nga gazetarët që prisnin jashtë, por ishte kunati i saj, vëllai i Admirit, që konfirmoi identifikimin, duke thënë se personi i vrarë ishte vëllai i tij.
GJURMET E GISHTAVE
Ditën kur ndodhi ngjarja, Policia tha se nuk kishte mundur ta identifikonte grabitësin që mbeti i vrarë gjatë shkëmbimit të zjarrit me forcat e FNSH-së. Për të mësuar identitetin e tij, viktimës iu morën gjurmët e gishtave, në mënyrë që të verifikoheshin në sistemin e të dhënave.
Nga ana tjetër, iu kërkua ndihmë edhe kompanisë “Aleat”, për të bërë një krahasim të përafërt gjurmësh, edhe pse në këtë rast mund të mos rezultonte efektiv, pasi procedura e marrjes së gjurmëve të gishtave për dokument identiteti është e ndryshme nga procedura daktiloskopike, kur një person është me precedentë penalë.
Kur në asnjërin nga rastet nuk u arrit identifikimi i tij, Policia kërkoi ndihmën e shteteve fqinje, një prej tyre edhe Greqia. Përgjigjja e mbërritur dje nga atje konfirmoi zyrtarisht se bëhej fjalë për Admir Muratajn.
/PANORAMA/
