Aurela Gaç në fillim të Marsit humbi një nga personat e dashur të familjes së saj. Gjyshja e këngëtares që ishte e sëmur në gjendje të rëndë, ndërroi jetë. Por edhe pse u nda nga jeta në gjendje shumë të rëndë ajo u kujdes që të linte një amanet për Aurelën.
“Kur të vdes unë, dua të kendoni”, i tha gjyshja Aurelës, e cila i mban vathë në vesh fjalët e saj.
Së fundit, këngëtarja ka publikuar një video në Instagram, ku shfaqet duke kënduar këngën më të ndjeshme të repertorit të saj, atë për nënën kompozuar nga Adrian Hila.
“Nuk rrija dot pa e ndarë me ju. Ishim në disa momente provash sot. Ka 3 vjet që e kam publikuar, por në live s’e këndoj shpesh sepse më duket sikur prek ca tela shpirti. Epo sot nuk rrija dot”, shprehet këngëtarja duke pasur parasysh se një muaj më parë humbi të gjyshen.
Megjithatë ajo vijon të plotësojë amanetin e saj dhe të këndojë pavarësisht gjithçkaje.
