Ministri i Brendshëm, Sandër Lleshaj, ka folur nga foltorja e Kuvendit lidhur me grabitjen në pistën e aeroportit “Nënë Tereza”, ku nga persona të armatosur u grabitën miliona euro.
Lleshaj ka habitur me deklaratat e tij, ku nuk ka kursyer krahasimin mes kësaj grabitjeje dhe sulmeve terroriste të 11 shtatorit 2001 në SHBA.
“Nuk ka asgjë për t’u alarmuar, ua them miqësisht. Nuk është turp kombëtar, është incident. Ta fillojmë nga superfuqia e botës. Mos harroni 11 shtatorin, pre e sulmeve të tilla kanë ndodhur në shtete shumë më të fuqishme”, tha ai.
Lleshi në vijim tha se policia ka reaguar në kohë record, duke dominuar situatën pavarësisht se është vënë përballë sulmit masiv criminal.
“Policia ka reaguar në kohë rekord. Është vënë përballë një sulmi të armatosur masiv përballë një grupi kriminal, por ka arritur të dominojë situatën dhe të sigurojë prova të rëndësishme”, theksoi Lleshaj.
Në vijim ai ka mbrojtur vendimin e marrë nga qeveria për përfshirjen e Forcave të Armatosura në sigurinë e aeroportit.
“Nuk e pranoj nga askush që është rrëzuar siguria. Megjithatë, në masën e parë serioze u shqetësuan të gjithë pse u vunë Forcat e Armatosura në mbrojtje të aeroportit”, u shpreh ai.
