Nga Boldnews.al
Prokurorja e Përgjithshme e Përkohshme, Arta Marku, ka debatuar ashpër me ish-drejtuesin e Prokurorisë së Tiranës, Sokol Malaj, për votimin e një kandidati të vetëm për vendin vakant të Këshillit të Lartë të Prokurorisë.
Arta Marku ka vendosur që të kryejë procesin e përzgjedhjes e kandidatit të vetëm, prokurorit Vatë Staka, në postin e mbetur vakant pas shkarkimit të Antoneta Sevdarit.
Prokurori Malaj, si përfaqësues i 1/10 së prokurorëve, ka propozuar që votimi të mos kryhet, për shkak se është një garë pa rivalitet. Malaj ka propozuyar që mbledhja të shtyhet dhe të rihapet procesi i kandidimit.
Por ky propozim është përballur me reagimin nervoz të Kryeprokurores së Përkohshme, Arta Marku. Kjo e fundit, duke i kujtuar prokurorëve se e drejton ajo mbledhjen dhe institucionin, i ka kërkuar prokurorit Malaj që të largohet nga mbledhja nëse nuk dëshiron të qëndrojë.
Marku i ka përsëritur disa herë prokurorit Sokol Malaj që të ndërpresë fjalën e tij, duke hasur në kundërshtitë e tij.
Pavarësisht këtij debati, në përfundim është vendosur ashtu siç kërkonte Arta Marku. Prokurorët, në këtë moment, po përgatiten të votojnë për kandidatin e vetëm, Vatë Staka, i cili duket që është i paracaktuar për të qenë anëtar i Këshillit të Lartë të Prokurorisë.
