Ditën e sotme i ftuar në emisionin “Rudina” ishte kantautori i njohur Pirro Çako. Ai foli për rikthimin e tij në muzikë, me bashkëpunimin me Xhensila Myrtezaj- “Sekreti im”.
Ndër të tjera, ai kujtoi dhe të atin e ndjerë Gaqo Çakon,i cili u nda nga jeta në gusht të vitit 2018. Pirro rrëfen se familja ka qenë gjithnjë shtysa e tij për të bërë muzikë të mirë:
“Ishte familja ime që insistonte, mamaja më lutej ‘pse nuk kthehesh’. Në një debat kur babai ishte ende në muajt e fundit i thashë: ‘Boll nuk bëj më këngë’. Por ai më kujtoi Verdin, i cili ka bërë muzikë deri në moshën 82-vjeçare. Më tha: Pse të mos shkruash këngë sa më gjatë? Nuk duhet të tërhiqesh, shkruaj më rrallë por kur të rikthehesh shkruaj diçka që vërtet t’ia vlejë. Kjo frazë më kthehet çdo ditë kur eci rrugëve, kur s’kam dëshirë të punoj. Kam bërë betimin që do t’ia realizoj atë dëshirën dhe këshillën që më dha për të mos ndaluar asnjëherë së bëri muzikë.”
Në fakt rikthimi i tij ishte vërtet një sukses, pasi kënga numëron mbi 6 milionë klikime dhe është pëlqyer shumë nga publiku.
