Hetimet për aksidentin e ndodhur mesditën e djeshme në autostradën Tiranë-Durrës, ku u përfshi në aksident Ermira Kazhani dhe ku mbeti i plagosur një shtetas, i cili u përplas nga automjeti që drejtohej nga gazetarja po kryhen nga komisariati nr 6 i policisë së Tiranës.
Mësohet se sot në këtë komisariat ka dhënë dëshminë e saj edhe Anjeza Maja, moderator e njohur e angazhuar në ERTV, e cila njihet për miqësinë e Kazhanin.
Burimet shprehen se moderatorja me cilësinë e dëshmitares ka rrëfyer ngjarjen, ndërkohë që dyshimet e policisë janë që këmbësori i ka prerë rrugën menjëherë automjetit, gjë që ka shkaktuar aksidentin.
Policia nxori një ditë më parë se automjeti me të cilën udhëtonte gazetarja ishte brenda normave të lejuara, gazetarja nuk kishte konsumuar pije alkoolike, ndërsa personi i aksidentuar vraponte për të kaluar nga njëra anë në tjetrën, kur u godit nga makina.
Kazhani është marrë në pyetje nga grupi hetimor, ndërsa i riu ende i paidentifikuar ndodhet në gjendje të rëndë në spitalin e Traumës.
Raportohet se ai është në gjendje kome, në rrezik për jetën, dhe me frymëmarrje të drejtuar. I riu ka marrë goditje të forta në pjesën e kokës dhe në pjesë të tjera të trupit dhe përplasja ka qenë e fortë.
Njëra prej këpucëve që mbante veshur i riu dje u gjet pranë automjetit, që ka pësuar dëmtime të shumta.
Nga raportimet mësohet se Kazhani, në drejtimin e mjetit, ka tentuar të frenojë, por nuk ka shmangur përplasjen me të riun, i cili pasi është goditur nga mjeti me pjesën e përparme, ka rënë mbi xhamin e mjetit.
“Rreth orës 15:10, në autostradën “Tiranë-Durrës” mjeti me drejtuese shtetasen E.K., është përfshirë në aksident me një këmbësor ende të paidentifikuar, i cili ndodhet në spital nën kujdesin mjekësor.
Nga veprimet e para, dyshohet se këmbësori në tentativë për të kaluar nga një krah i autostradës në tjetrin i ka prerë rrugën automjetit.
Drejtuesja e mjetit është vënë në dispozicion të organeve hetimore dhe ndodhet në ambientet e Policisë.
Grupi hetimor ka kryer veprimet e para hetimore dhe po punon për zbardhjen e plotë të rrethanave të ngjarjes”, thuhet në njoftimin e djeshëm të policisë.
Aksidenti u mbulua me mister në momentet e para, kur fillimisht u tha se i aksidentuari kishte goditur mjetin.
Më pas pati raportime që automjeti kishte tentuar të frenonte për disa metra, por nuk shmangi dot goditjen. Në raste të tilla ndodh kur frenat kanë defekt ose shpejtësia ka qenë e lartë.
Por nuk përjashtohet mundësia që i aksidentuari të ketë dalë menjëherë me vrap dhe ti ketë prerë rrugën mjetit.
Po kështu u raportua fillimisht se gjendja shëndetësore e të aksidentuarit është jashtë rrezikut për jetën, ndërkohë që në mbrëmje u denoncua nga ish-kryeministri se i riu ndodhet në gjendje kome, me frymëmarrje të drejtuar, pra në gjendje të rëndë shëndetësore.
