Policia e Kukësit ka proceduar 13 persona lidhur me protestën e zhvilluar dje në qytetin verior, gjatë vizitës së kryeministrit Edi Rama.
“Në lidhje me protestën e paligjshme, të zhvilluar më datë 05.04.2019, të organizuar nga subjekti politik PD Kukës e Has, në vendin e quajtur ‘Ura e Drinit të Zi’ janë proceduar në gjendje të lirë 13 shtetas, të moshës nga 28 – 60 vjeç, nga Kukësi e Hasi”, bënë me dije burime zyrtare nga Policia lokale.
Procedimi ndaj tyre filloi pasi, kanë penguar qarkullimin e mjeteve të transportit, si dhe kanë kundërshtuar punonjësit e Policisë së Shtetit, shtuan të njëjtat burime.
“Materialet për veprime të mëtejshme do t’i kalojnë Prokurorisë Pranë Gjykatës së Shkallës së Parë Kukës, për veprat penale ‘Kundërshtimi i punonjësit të rendit publik’, ‘Organizimi dhe pjesëmarrja në grumbullime e manifestime të paligjshme’ dhe ‘Pengimi i qarkullimit të mjeteve të transportit’”, thuhet në njoftimin e Policisë. /BN/
*Takimi i Ramës në Kukës/ Protestuesit çajnë kordonin e Policisë dhe futen në aeroport (VIDEO)
