Kryeministri Edi Rama ka konfirmuar Safet Gjicin për kandidat të PS-së në zgjedhjet lokale.
Konfirmimin e dha nga takimi në aeroportin e Kukësit. “Është koha që të na jepni bashkinë”, tha Rama gjatë takimit, ndërsa më tej u kthye nga Safet Gjici, i cili shoqëronte Ramën dhe u shpreh: “Kandidatin nuk e solla unë e gjetëm mes jush. Ja ku e keni. Po s’fituat kampionatin të paktën fitoni Bashkinë. Nuk e sollëm ne e gjetëm mes jush”.
“Besoj që jeni dakord që Safet Gjicin ta keni kryetar bashkie”, tha Rama në fund të fjalës së tij.
Jo zgjedhje të parakohshme
“Në 30 qershor janë zgjedhjet”, tha Rama, duke u shprehur kundër kërkesës së opozitës për zgjedhje të parakohshme.
Akuzat ndaj opozitës
Më tej, gjatë ligjëratës së tij, shefi i ekzekutivit sulmoi opozitën për vendimin e djegies së mandateve.
“Kur ke një kundërshtar copë-copë edhe ti vetë shpërqendrohesh. Por këtu dua të kujtoj një moment kritik që patëm me Kukësin kur u vendos tarifa e rrugës. Faktikisht, ne ishim gabim dhe ju kishit të drejtë! Ajo që ka rëndësi ama është që deri dje Kukësi dhe e gjithë Shqipëria kishin një qeveri e cila gabonte shumë, mendonte pak dhe nuk reflektonte kurrë. Ndërkohë që sot ne gabojmë herë pas herë, mendojmë shumë dhe reflektojmë kur gabojmë. Në nuk jemi të rënë nga qielli dhe duke u përpjekur të bëjmë sa më shumë e kemi të pamundur ti shmangim gabimet. Edhe ai që ndodhi me ju nuk ishte gabim i vogël, por ajo që është e rëndësishme, është që jemi të vetëdijshëm për faktin që gabojmë dhe i japim të drejtë njerëzve kur kanë të drejtë. Dhe në këtë rast ju kishit të drejtë dhe më vjen shumë mirë që e kujtoj faktin se reaguam ashtu siç duhet. Sot kemi gjetur një rrugë të arsyeshme që po sjell dhe investime. Pasi në Rrugën Kombëtare të vazhdojmë të investojmë për njërën anë të rrugës… Siç lanë rrugët rrugëve lanë dhe veten rrugëve rrugët. Ne i kemi për detyrë ndërtimin e rrugëve, po s’kemi të nxjerrin këta nga halli që kanë. Kush i tha të ikin nga parlamenti, mirë që ikin, po pse duhan të hyjnë me zot në parlament çdo të enjte. Ikët, ikni. Pse? Brenda ishin kush ju nxori?!”, tha Rama. /Boldnews.al/
