Kapiteni i Skënderbeut, Marko Radas, është rikthyer pranë ekipit dhe menjëherë pas ardhjes në Shqipëri ka zgjedhur që të hedhë poshtë të gjitha ato zëra e deri-diku akuza që iu atribuuan lojtarit për mungesën në ndeshjen kundër Luftëtarit. Numri 33 i Skënderbeut, menjëherë pas kthimit nga Kroacia, ka zbardhur edhe një herë arsyen se pse ka munguar përgjatë këtyre ditëve.
REAGIMI – Radas ka zgjedhur vetë të kontaktojë gazetën “Panorama Sport”, duke treguar se largimi i tij drejt Kroacisë nuk ka qenë një braktisje e ekipit, por domosdoshmëri për arsye familjare. “Sapo jam kthyer dhe sot (dje) do të bashkohem me Skënderbeun në stërvitje për të filluar përgatitjet për ndeshjen e radhës kundër Partizanit. Në këtë situatë të krijuar me largimin tim në Kroaci, jam mërzitur disi për shkak të interpretimit që iu dha kësaj çështjeje. Unë nuk u largova për shkak të problemeve me financat, sikundër u fol, as nuk kam braktisur ekipin”./PanoramaSport
