Xheni Karaj është ndër aktivistet e para që kanë nisur lëvizjen për të drejtat LGBTI në Shqipëri, një komunitet që përfshin lesbiket, personat gej, biseksualët, transgjinorët dhe ata interseks. Ajo nuk do të ngurronte të shfaqte anën e saj të vërtetë dhe hapur lidhur me qëndrimin e saj për të drejtat e personave me orientime seksuale të ndryshme.
Sot ajo ishte e ftuar në emisionin “Rudina” në Tv Klan, ku rrëfeu historinë e saj. E pyetur nëse do të dëshironte të bëhej nënë, Xheni Karaj tha se dëshiron të përjetojë procesin e lindjes së një fëmije dhe se shpreson që në të ardhmen të bëhet nënë.
“Unë jam pro lindjes së fëmijëve në familjet LGBT dhe shpresoj të bëhem nënë një ditë. Shpresoj që në të ardhmen duke përmirësuar jetën në një vend si Shqipëria të kemi mundësi që edhe ne të krijojmë familje si gjithë të tjerët. Unë personalisht do dëshiroja të përjetoja procesin e lindjes së një fëmije. Kam dëgjuar nga nëna ime që është një proces që të pasuron dhe do të doja. Edhe Livia dëshiron ta përjetojë këtë proces. Nuk ka rëndësi nëse dashurinë, ngrohtësinë një fëmije ia japin dy nëna, një baba apo tezja”, tha Karaj.
