Të shtëna me armë zjarri u shkrepën në drejtim të një biznesi në Fier mbrëmjen e kësaj të mërkure. Nga ngjarja nuk raportohet për persona të lënduar.
Burime zyrtare nga Policia lokale bënë me dije se: “Në lagjen ‘1 Maji’, në afërsi të vendit të quajtur “Kryqëzimi i Parkut”, persona ende të paidentifikuar, duke udhëtuar me një mjet tip “BMV” kanë qëlluar me armë zjarri drejt një subjekti tregtar (pjesë këmbimi të makinave). Më pas makinës “BMV” i është vënë zjarri në rrugën Fier- Seman, në vendin e quajtur “Kryqëzimi i shinave të trenit”. Aty u gjet nga efektivët e Policisë.
Në vendngjarje kanë shkuar shërbimet e policisë dhe shërbimi zjarrfikës për shuarjen e zjarrit. Është ngritur grupi hetimor dhe po punon për zbardhjen e plotë të kësaj ngjarje, identifikimin dhe kapjen e autorëve.
Ndërkohë, burime policore thanë se, në makinë janë gjetur armë zjarri dhe municione dhe se targat e automjetit rezultuan false./BN/
