Duket se krizës politike që ka kapur vendin do ti shtohet edhe një krizë tjetër akoma më e madhe, ajo e refugjatëve. Zërat se ardhja e emigrantëve sirianë nga Turqia drejt Shqipërisë, janë shtuar.
Ka qenë vetë drejtori i Drejtorisë së Kufirit dhe Migracionit në Gjirokastër Idajet Hoxha, i cili në një takim në prefekturë pohoi se, fluksi i refugjatëve ka shënuar rritje përgjatë muajve të fundit.
Sipas tij vetëm në dy ditë janë dërguar në qendrën e pritjes në Tiranë, rreth 65 refugjatë që kanë hyrë nga pika kufitare e Kakavijës.
Ai ka konfirmuar gjithashtu se pritet një fluks i madh refugjatësh në ditët në vijim.
Ai tha se sikur vetëm 10% e sasisë së raportuar nga burime të pakonfirmuara të hynte në territorin tonë, do ta fuste Shqipërinë në emergjencë kombëtare pasi ne nuk kemi kapacitetet e nevojshme pritëse për një fluks kaq të madh refugjatësh.
Sipas News 24, situata ka shqetësuar edhe shtetin grek pasi karvani që besohet se kap shifrën e mbi 12 mijë njerëzve e që do niset nga Turqia, do të kalojë në Greqi dhe Shqipëri.
