Nga Boldnews.al
Kur Edi Rama priti Kancelaren gjermane Angela Merkel në vitin 2015 në Tiranë, e lexoi keq atë vizitë, duke e marrë si vlerësim personal të tij. Merkel foli për integrimin e Ballkanit, zhvillimin ekonomik, luftën kundër korrupsionit dhe më pas integrimin drejt BE-së të vendeve të Ballkanit Perëndimor..
Fjalë që kurrë nuk u “dëgjuan” nga Rama, por ky i fundit kaloi edhe në aventurë. Në disa takime që edhe ai pati në Berlin dhe Ballkan, u mundua të marrë rolin e “liderit rajonal”, por shpejt përfundoi si “lideri i Elisës”…
Ndërsa BE priste një hov domethënës të Shqipërisë, Rama kanabizoi vendin përgjatë viteve 2016-2017, dhe në vend të “integrimit”, i ofroi Gjermanisë, Francës apo Holandës drogë dhe azilantë. Sikur të mos mjaftonin këto dy çështje thelbësore që lidhen me emigracionin e paligjshëm dhe trafikun e narkotikëve, kryeministri Edi Rama një vit më parë kaloi në delir të paprecedent.
Bashkë me presidentin e Kosovës Hashim Thaçi, hodhën në “treg” idenë e korrigjimit të kufijve apo (shkëmbimit të territoreve), mes Kosoëvs dhe Serbisë, që nënkuptonte kalimin e Mitrivocës së Veriut nën Serbi dhe Kosova përfitonte Luginën e Preshevës.
Një nismë e tillë u kundërshtua hapur nga kancelaria gjermane, që nga loja e “mendjes” së Ramës dhe Thaçit, u detyrua të vizitonte Kroacinë dhe prej andej të deklaronte hapur: “Shkëmbimi i territoreve është një nismë e rrezikshme, që do sillte efekte zinzhirë në të gjithë Ballkanin”.
Nga ana tjetër, Rama nuk tërhiqej nga të qenit “protagonist i së keqes”. Nën tentativën për të treguar një “patriotizëm folklorik”, ai deklaroi se nëse BE nuk hap dyert për Shqipërinë dhe Kosovën, atëherë shqiptarët kanë të drejtë që të bashkohen mes vetes. Deklarata të tilla maksimumi ekzaltuan “Skënderbeshën” e tij, por Europa nuk po e merr seriozisht. Dhe nuk është rastësi që Rama ka dy vite që është izoluar ndërkombtarisht.
Që nga viti 2016 dhe në vijim, kryeministri ka shkuar disa herë në Berlin, por si një piktor shëtitës, duke hapur galeri me veprat e tij të botës imagjinare dhe nuk ka pasur asnjë takim me zyrtarë të nivelit të lartë. Po ndjen braktisjen nga bota e jashtme, që thjesht po e mbajnë në këmbë për një lloj stabilokracie me shumë probleme.
Sot Rama ishte i çoroditur në Parlament, jo për shkak të protestës, por nga vizita që kryedmokrati Lulzim Basha po kryen në Gjermani. Kryetari i Partisë Demokratike, është parë sot në mëngjes duke hyrë në kancelarinë federale gjermane në Berlin. Basha ka takime me zyrtarë të rëndësishëm në kancelarinë e drejtuar nga Angela Merkel, kryesisht me drejtues të Parlamentit Gjerman, Bundestagut, zyrtarë të lartë të Qeverisë Federale dhe drejtuesit e partive CDU dhe CSU.
Megjithatë Rama në Parlament u mor me batuta dhe kundërbatuta me deputetin demokrat Myslym Murrizi, apo Ylli Shehu, dy “përfaqësuesit” e denjë opozitarë. Tashmë vetëm ai ka mbetur si “politikan ndërkombëtar”, dhe vizitat “jashtë vendit” konsideron udhëtimet nga Tirana drejt Librazhdit, Poliçanit, apo Durrësit të Gjushit…
