Data 2 prill nuk shënon vetëm masakrën e Shkodrës, por edhe Ditën Ndërkombëtare të Autizmit.
Në këtë ditë të shënuar presidenti Ilir Meta ka marrë pjesë në aktivitetin kushtuar kësaj shtrese në nevojë ndërkohë që ka bërë edhe një apel për më shumë mbështetje dhe sensibilizim, siodmos ndaj fëmijëve që vuajnë nga kjo sëmundje.
Ndër të tjera ai ka lartësuar edhe dhuntitë e shumë prej fëmijëve të prekur nga kjo sëmundje, duke prezantuar një djalosh, me një talent të padiskutueshëm në pikturë, 21-vjeçar Drini Sallaku. Ai u shpreh se është padyshim piktori i tij i preferuar ndërsa dha edhe mesazhin e tij në fjalën përshëndetëse.
Mesazhi i presidentit Ilir Meta
Shumë i lumtur të nisja ditën duke i uruar mirëseardhjen në Presidencë, Drini Sallakut, një student me aftësi ndryshe, por jashtëzakonisht i talentuar në pikturë.
Së bashku me shokët e shoqet e tij, si dhe me mësues të Liceut Artistik “Jordan Misja”, ne patëm kënaqësinë të përuronim edhe ekspozitën e 11-të të Drinit me 20 piktura, i cili tashmë ndihet i mirëintegruar në klasën dhe shkollën e tij.
Sot me rastin e Ditës Botërore të Ndërgjegjësimit për Autizmin, mesazhi ynë i përbashkët është për më shumë përkujdesje, dashuri dhe socializim për të gjithë fëmijët me autizëm, të cilët e meritojnë të gjithë përkrahjen tonë për të zhvilluar aftësitë e tyre.
Shoqëria shqiptare ka ende shumë nevojë për të rinj që shfaqin solidaritet dhe të cilët janë faktor i rëndësishëm për të sjellë ndryshimin e madh në kauzat sociale.
Falënderim të veçantë për nënën e Drinit, Edlirën dhe për të gjitha nënat e mrekullueshme që kujdesen me shumë dashuri për rritjen dhe edukimin e fëmijëve me aftësi ndryshe.
/Boldnews.al/
