Nga Boldnews.al
Armand Lukani e Amelda Elezi, motër e vëlla nga Vlora, janë vënë në pranga nga policia e Lezhës për akuzat e trafikut të drogës dhe lëndëve plasëse.
Ndërsa në kërkim u shpall E.E., 27 vjeç, edhe ai nga Vlora (i dënuar më parë) pjesë e grupit në të cilën bënin pjesë dy të rinjtë, Armandi 23 vjeç dhe Amelda 21 vjeçe.
Aksioni
Burime zyrtare nga Policia e Lezhës bënë me dije këtë të martë arrestimin e dy të rinjve në kuadër të aksionit të koduar “The long Way”, i ndjekur me metoda prooaktive. Operacioni nga sektori për hetimin e krimeve në Drejtorinë Vendore të Policisë Lezhë në bashkëpunim me Prokurorinë e rrethit, çoi në sekuestrimin e 3 minave të montuara me telekomandë të shpërthimit në distancë, 2.3 kg lëndë narkotike e dyshuar marijuanë si dhe 1 telefon celular.
Motër e vëlla u arrestuan në flagrancë në qytetin e Lezhës, pasi nga kontrolli në çantat e tyre u gjetën të fshehura 3 minat si dhe një sasi prej 2.3 kg lënde narkotike e dyshuar marijuanë, njoftoi Policia. “Materialet procedurale në ngarkim të tyre u referuan në Prokurorinë pranë Gjykatës Shkallës së Parë Lezhë për veprime të mëtejshme, për veprat penale ‘Trafikimi i lëndëve plasëse’ dhe ‘Prodhimi dhe shitja e lëndëve narkotike’ parashikuar nga nenet 282/a/2 dhe 283/2 të Kodit Penal”, shtuan të njëjtat burime.
Hetimet
Hetimet me metoda proaktive kanë zbuluar se pjesëtarët e grupit transportonin mina nga Vlora për në Lezhë, ku kishin si synim tregtimin, tha një burim pranë grupit hetimor. Çmimi i shitjes shkonte mbi 2000 euro secila.
Hetimet janë në vijim për të zbuluar origjinën e lëndëve plasëse dhe destinacionin e tyre. Dyshimet janë se minat tregtoheshin edhe në Mal të Zi, për tu përdorur në ngjarje kriminale në shtetin fqinjë.
