Kërcënohet drejtori i ALUIZNIT në Kukës, Vladimir Spahiu. Policia e Kukësit ka vënë në pranga autorin, Petrit Hallaçi, 40 vjeç, banues në qytetin verior, për veprat penale “Kanosja për shkak të detyrës” dhe “Prishja e qetësisë publike”.
Ngjarja
Burime zyrtare nga Policia e Kukësit bënë me dije këtë të martë se, pasi është marrë informacion se një shtetas ka kërcënuar Spahiun për shkak të detyrës, menjëherë strukturat e Policisë të Komisariatit dhe DVP Kukës kanë vlerësuar informacionin dhe organizuar punën, ku u bë e mundur arrestimi në flagrancë i shtetasit 40-vjeçarit, banues në Kukës.
Nga veprimet hetimore, shtuan të njëjtat burime, rezulton se Hallaçi, ka kërcënuar Vladimir Spahiun 46 vjeç, banues në Kukës (drejtori i ALUIZNIT), për shkak të detyrës, dhe është larguar në banesë për të marrë armën e gjahut të cilën e posedonte me leje, ku është rikthyer përsëri, duke prishur dhe qetësinë publike. Në këto ka ndërhyrë Policia duke bllokuar 40-vjeçarin dhe sekesutruar armën e zjarrit.
“Materialet për veprime të mëtejshme i kaluan Prokurorisë së Rrethit Gjyqësor Kukës për veprat penale ‘Kanosja për shkak të detyrës” dhe “Prishja e qetësisë publike’”, thuhet në njoftimin paraprak të Policisë. /Boldnews.al/
