Një i ri ka mbetur i plagosur rëndë si pasojë e një sherri të ndodhur një ditë më parë në Maliq të Korçës.
“Specialistët e Seksionit për Krimet në Komisariatin e Policisë Maliq, bënë arrestimin në flagrancë të shtetasit U.Z, 26 vjeç, si edhe filluan procedimin penal në gjendje të lirë ndaj shtetasit L.H, 18 vjeç, banues në fshatin Kolanec”, bënë me dije burime zyrtare nga Policia e Korçës.
“Ditën e djeshme, në fshatin Kolanec, dy shtetasit e mësipërm, janë konfliktuar për motive të dobëta me shtetasin M.K, 23 vjeç, banues në Klocë, ku gjatë konfliktit shtetasi U.Z, dyshohet se ka plagosur me send të fortë 23 vjeçarin, i cili ndodhet në Spital nën kujdesin intensiv të mjekëve, ndërsa shtetasi L.H, e ka kanosur. Materialet në ngarkim të tyre i kaluan Prokurorisë pranë Gjykatës së Shkallës së Parë Korçë për veprat penale ‘Plagosja e rëndë me dashje’ dhe ‘Kanosja’”, shtuan të njëjtat burime. /BN/
