Ervin Salianji, ish-deputet i PD-së, sqaroi mbrëmjen e sotme se mes Alfred Alizotit dhe Taulant Ballës ka 8 thirrje telefonike.
I pyetur përsa i takon përfshirjes së Alizotit, Salianji sqaroi fillimisht se në përgjim janë futur të gjithë numrat që kanë komunikuar qoftë edhe një herë me Babalen.
“Alizoti ekziston si i njohur i Babales, pastaj ka pohuar se qëndronte nga pas Babales se mos e kërcënonin, ndërsa më pas është rekrutuar nga Policia.
Atëherë Alizoti del dhe thotë se ka luajtur rolin e Agron Xhafajt.
Alizoti ka qenë në përgjim për disa muaj, madje në përgjime del ajo mënyrë komunikimi që ne kemi dëgjuar.
Në bisedë të lirë Alizoti ka pohuar se ka takuar nga Taulanti, Drejtori i Policisë Ard Veliu, ai i Fierit.
Në një bisedë me një shokun e tij, ai i thotë: më është afruar një gjë e mirë, e ke parasysh. Shoku im nga Librazhdi.
Ja tani jam me atë shokun nga Librazhdi, do takoj edhe Taulantin tani.
Tabultatet telefonike të prokurorisë tregojnë se ky person ka 8 thirrje me Taulant Ballën”, tha Salianji.
Duke iu referuar asaj çka deklaruar në Prokurori, Taulant Balla, Salianji sqaroi se “Taulanti ka pohuar se mund të ketë tentuar ndonjëri të komunikojë me mua, por s’kam folur”.
Në vijim Salianji theksoi se nga përgjimet e prokurorisë është bërë e njohur se drejtuesit e Policisë së Fierit kanë folur me dhjetëra herë me Alfred Alizotin, i kanë dhënë lekë.
“Në dëshminë që kanë dhënë në Prokurori këto drejtues të policisë gënjejnë, pasi pohojnë se e kanë takuar vetëm 1 herë, ndërkohë që janë me dhjetëra herë”, tha Salianji.
Ish-deputeti i PD-së theksoi se SHISH dhe Prokuroria e Krimeve të Rënda kanë qenë të informuar lidhur me historinë e trafikut të drogës nga një grup kriminal.
Sipas tij, referuar përgjimeve zyrtare, grupi kriminal do të trafikonte 1 ton drogë, ndërsa Babalja do të fuste 100 kg në këtë sasi.
