Nga Boldnews.al
Kryeministri Edi Rama duhet falënderuar, kryebashkiaku i Vlorës po ashtu. Të dy u bënë herojtë e ditës, në mënyrë indirekte, shpëtuan nga vdekja e sigurtë, një ose më shumë persona që qarkullonin me automjet. Poshtë makinës së tyre, ishte vendosur një sasi e madhe eksplozivi, 300 gramë tritol.
Mjeti duke u lëkundur në rrugët me gropa brenda lagjeve të qytetit, preku në minën e telekomanduar dhe ajo u shkëput. Shpëtuan, duke ikur pa e kuptuar se poshtë makinës ishte vdekja e tyre.
Është mëkat që sot jetëgjatët nuk e felenderojnë dot “të gjatin” dhe kryebashkiakun. Sepse pikërisht ajo rrugë e lënë pa shtruar prej tyre, solli mrekullinë. Edi Rama dhe Dritan Leli duhen shpallur jo vetëm qytetarë nderi, por heronj të gjallë, njëri kryeministër dhe deputet i zonës dhe tjetri kryebashkiak.
Ata i kanë përqëndruar investimet kryesisht në hyrje daljen e Vlorës. Aty ku ka më shumë sy, në Lungo Mare sidomos. Gjithçka ngjan bukur, e sistemuar, më ndriçim, pista vrapimi, pista më biçikletë dhe pemë të gjelbërojnë.
Nëse rruga brenda lagjeve të Vlorës do ishte e shtruar, mina me telekomandë nuk do shkëputej, si pasojë do shpërthente e me siguri do kishte viktima, pasi sasia e tritolit ishte mjaft e madhe.
Sa mirë që nuk kaluan nga Lungo Mare, pasi shpërthimi do kishte ndodhur! Faleminderit Edi Rama! Gjithsesi, qytetarët duhet të jenë vigjilentë, kaloni me rrugën me gropa, sa për siguri, nëse të është vënë tritoli poshtë mjetit, me gjasë do bjerë!
Kjo vlen më shumë për personat që janë përfshirë në konflikte, mirë është mos i bien nga Lungo Mare, aty nuk ka gropa, nëse ju ndodh atentati, mos u ankoni, Rama dhe Leli ua dhanë një mundësi.
