Mungesa në finalizim dhe golat e pakët të shënuar gjatë këtij sezoni kanë qenë problematika kryesore për Skënderbeun në kampionat. Në ndryshim nga një vit më parë, në të njëjtin numër takimesh të luajtura Skënderbeu numëron 20 gola më pak të shënuar gjatë këtij kampionati.
Statistika që kanë shqetësuar herë pas here stafin teknik, duke bërë që ditën e djeshme në seancën stërvitore bardhekuqtë të punojnë pikërisht për këtë problem.
Skënderbeu është spostuar në Durrës për të përgatitur sfidën me Luftëtarin dhe trajneri Orges Shehi ka zgjedhur që të mbajë ekipin të ngujuar më së shumti para porte, me qëllim që të përmirësohen manovrat sulmuese. Kërkues në çdo ushtrim, numri një i pankinës së Skënderbeut ka përcaktuar qartazi direktivat për sulmin.
Për më shumë se 30 minuta, ekipi ka qenë totalisht i përqendruar me ushtrimet para porte, goditje të kuadratit dhe aksione të ndërtuara nga krahët në veçanti gjatë seancës së djeshme. Ushtrime, të cilat trajneri Shehi i ka kthyer herë pas here kur nuk ndërtoheshin në mënyrën e duhur.
Në kushte të tilla, trajneri bardhekuq ka kërkuar efikasitet në goditjet e portës, me qëllim që realizimi të jetë në nivel më të lartë. E veçanta e djeshme ka qenë se trajneri kritikat nuk i ka pasur vetëm në raport me sulmuesit, por me të gjithë pjesën e ekipit që merr përsipër të shkojë në portën kundërshtare, duke lënë të kuptohet se jo vetëm sulmuesit janë përgjegjës për mungesën e golit.
FORMACIONI – Pas 30 minutash “ngujim” në portë, Shehi ka punuar edhe për formacionin e mundshëm që do të hedhë në fushë të shtunën ndaj Luftëtarit në Gjirokastër. Duke parë mungesën e Leonit Abazit në krahun e majtë të mbrojtjes, trajneri i Skënderbeut ka menduar menjëherë për zëvendësuesin e tij.
Është i riu Jorgo Pëllumbi, i cili ka dhënë garanci sa herë ëstë aktivizuar dhe duket alternativa më e mirë për bardhekuqtë në këtë ndeshje. Nga ana tjetër, dilema e vetme e Shehit për sa i përket formacionit qëndron në mesin e fushës. Shqipërim Taipi duket se nuk e ka të sigurt ende formacionin pas problemeve fizike të shfaqura javën e kaluar. Për këtë, bardhekuqtë do të presin edhe disa ditë për të parë formën e shqiptarit nga Maqedonia.
Nëse Taipi nuk ia del, korçarët do të luajnë me Ditën dhe Sibon në qendër të mesfushës, si dhe Pervan disi më të avancuar. Kjo ndeshje pritet të rikthejë si titullar për herë të parë në këtë vit edhe Dejvi Bregun. Si për ironi të fatit, pikërisht kundër skuadrës që shkëlqeu për tri sezone, Luftëtarit./PanoramaSport
