Pas largimit të Fidan Alitit, përgjegjësia e prapavijës te Skënderbeu ka rënë mbi Kaba Samboun dhe Jorgo Pëllumbin. Të dy të rinjtë, bashkë me Radasin, janë ata që u ka mbetur për detyrë që të krijojnë barrikadën bardhekuqe.
Dhe afrikani e ka më shumë se të qartë që të zëvendësosh një lojtar si Aliti, nuk është kurrsesi e lehtë, ndaj garanton se do të japë kurdoherë maksimumin për të përligjur besimin që i është dhënë.
ZËVENDËSIMI I ALITIT
Në një prononcim të dhënë për gazetën “Panorama Sport”, 22-vjeçari shpreh emocionet e aventurës në Korçë, duke filluar nga debutimi e deri te pozicioni i titullarit në qendër të mbrojtjes. “Të zëvendësosh Fidan Alitin, ka qenë një detyrë e vështirë, e cila më është besuar nga klubi dhe jam munduar ta mbuloj me shumë sakrificë dhe përgjegjshmëri.
Në të tilla kushte, unë mund të them se një lojtar si Aliti ka qenë shtyllë e prapavijës sonë dhe largimi i tij pa dyshim që nuk i ka bërë mirë ekipit. Gjithsesi, ishte rasti i artë për mua, pasi arrita që të tregoj aftësitë e mia dhe për këtë jam i lumtur.
Ajo që më ka ndihmuar jashtë mase, përveç direktivave të stafit, ka qenë edhe fakti se stërvitem gjithmonë me lojtarë me shumë eksperiencë si Radas, Vangjeli apo edhe Jashanica, i cili nuk mund të na ndihmojë këtë sezon. Me të tillë lojtarë duket se ky ekip ka cilësinë e duhur për të synuar plotësimin e objektivave. Kemi kaluar atë periudhë të errët dhe tashmë duket se jemi kthyer në rrugën e duhur.
Mbetet vetëm që të vijojmë atje ku e mbyllëm me Kukësin dhe të mendojmë gjithmonë për ndeshjen e radhës. Jam i mendimit se ky ekip mund të përmbushë objektivat sezonale që i janë caktuar nga klubi”, theksoi fillimisht lojtari nga Gambia.
KRITIKAT E SHEHIT
Nuk kishte si të mos ndalej edhe te kritikat që mori nga Orges Shehi për paraqitjen në miqësoren ndaj Pogradecit. Mbrojtësi tregohet më shumë i sinqertë kur thotë se trajneri ka të drejtë në gjithçka ka thënë, ndërsa paralajmëroi se të tilla gabime nuk do të përsëriten më kurrë as në miqësore dhe jo më në kampionat.
“Ka qenë një mesazh i qartë nga ana e trajnerit dhe plotësisht me vend. Mund të them se ishin kritika që na bëjnë mirë pas atyre paraqitjeve. I meritonim pa diskutim, ndaj tashmë do të na ndihmojnë që të rrisim përqendrimin dhe angazhimin për vazhdimësinë. Jemi në fund të kampionatit dhe duhet të arrijmë zonën europiane për këtë sezon.
Në ndeshjet zyrtare, por edhe në ato miqësore, nuk tolerohen shpërqendrimet dhe për këtë stafi dhe trajneri kanë të drejtë”, përfundoi Kaba Sambou.
/Panorama Sport/
