Kryelobisti i kryeministrit Edi Rama në Uashington DC të Shteteve të Bashkuara të Amerikës, Brian Ballard ka kontaktuar 5 herë Ambasadorin e Shteteve të Bashkuara të Amerikës në Tiranë, Donald Lu.
Qëllimi i kontakteve, sipas dokumenteve të marrë nga Faktor.al në Departamentin Amerikan të Drejtësisë, është marrëdhënia shqiptaro-amerikane, negocimi mes palëve politike në Tiranë në prag të zgjedhjeve dhe reforma në drejtësi.
Njeriu i presidentit Trump në Tiranë, ambasadori Lu duket nga dokumentet që disponon Faktor.al se ruan një integritet të lartë profesional dhe sjellje korrekte me palët.
Kompania Lobuese amerikane Ballard Partners e nënkontraktruar për 240 mijë dollarë nga Partia Socialiste në prag të zgjedhjeve parlamentare ka vënë kontakt për herët të parë me Ambasadën Amerikane në Tiranë, përmes një telefonate dhe një emali të dërguar nga Robert Wexler në datë 17 maj 2017.
Kontakti i dytë dhe i tretë është i datës 16 dhe 26 qershor 2017 me email për ambasadorin e SHBA, Lu po nga konsulenti i Ballard Partners, z.Robert Wexler. Me sa duket nga dokumentet, raporton faktor.al, nuk ka patur kthim përgjigje nga ambasadori amerikan në Tiranë.
Mirëpo kompania Ballard nuk ka humbur durimin dhe e ka kontaktuar për herë të katërt në 10 tetor po përmes emalit Lu duke i kërkuar një takim dhe ky takim i shumë kërkuar prej muajsh, ka ardhur më në fund në datën 17 tetor, por ambasadori Lu ka marrë në takim edhe shefen politike dhe ekonomike të ambasadës, Rocker për të qenë prezent.
