Kimet Çollaku nga Vlora, është vënë në pranga nga policia e Fierit, që ekzekutoi një masë sigurimi personal “arrest me burg” nga Gjykata e Fierit. Çollaku ishte në kërkim policor, i akuzuar se i ka marrë një shumë eurosh një shtetaseje, me anë të mashtrimit.
“Specialistët për Hetimin e Krimit Ekonomik e Financiar në Drejtorinë Vendore të Policisë Fier, ndaluan shtetasin e shpallur në kërkim: K.Ç, 35 vjeç, banues në Vlorë. Ndalimi i këtij shtetasi u bë pasi Gjykata e Shkallës së Parë Fier, ka caktuar masën e sigurisë ‘Arrest në burg’, për veprën penale ‘Mashtrimi’”, bënë me dije burime zyrtare nga Policia e Fierit.
Të njëjtat burome shtuan se 35-vjeçari Çollaku, për një periudhë një vjeçare, i ka marrë një shtetaseje me anë të mashtrimit shumën prej rreth 8 mijë euro.
Sipas hetimeve, Çollaku e ka mashtruar shtetasen në fjalë se do e merrte për grua, duke i marrë në këtë mënyrë dhe shumën e parave. Duke parë se martesa nuk po kurorëzohej, e dëmtuara ka bërë kallëzim duke cacur në nisjen e hetimeve dhe kërkesën e masës arrest me burg nga prokuroria, e miratuar më pas nga gjykata.
/Boldnews.al/
