Në ndeshjen e fundit, pa dyshim ka qenë një nga lojtarët më të mirë dhe më aktivë të Skënderbeut, duke i dhuruar ekipit golin me vlerën e tri pikëve në ndeshjen me Kukësin. Bruno Dita, me paraqitjet e fundit për ekipin bardhekuq është kthyer në liderin e mesfushës, teksa apelon për vijimësi pozitive edhe në ndeshjen e radhës pa parë se kush do të jetë pozicioni i kundërshtarit në renditje, por duke menduar vetëm për të marrë pikët maksimale në çdo takim. Kjo sipas Ditës do të ishte mënyra më e mirë që Skënderbeu të rikthehej në zonën që të çon në Europë.
Dita, rifillon kampionati pas pushimit të fundit të sezonit. Si duket Skënderbeu?
Po, ju e thatë shumë mirë, ishte pushimi i fundit i kampionatit dhe normalisht që do të duhet të bënim rikuperimin e mundshëm për të vijuar deri në fund sezonin. Jemi koshientë se na ka bërë mirë fizikisht kjo ndalesë, por që duhet të ruajmë të njëjtin përqendrim dhe angazhim që kishim ndaj Kukësit edhe në ndeshjen e radhës ndaj Luftëtarit.
Sa e vështirë është ta bësh një gjë të tillë?
Besoj se tashmë ekipi ka dalë nga ajo krizë rezultatesh dhe normalisht që do të jetë detyrë përqendrimi. Fitorja me Kukësin na bëri mjaft mirë. Në Gjirokastër është një ndeshje e vështirë, por që gjithsesi ky ekip i ka mundësitë që të fitojë në këtë takim.
Dy ekipe me objektiva të kundërta. Kujt i duhet më shumë suksesi në këtë ndeshje?
Nuk duhet të shohim aspak renditjen dhe të mos mendojmë për pozicionin e kundërshtarit në kampionat. Jemi duke parë vetëm veten tonë dhe po mendojmë vetëm për objektivat tona në këtë sezon. Na duhen fitore për të arritur zonën europiane.
Kur rivalët janë Teuta dhe Kukësi, a është e mundur një gjë e tillë?
Asnjë nuk është si Skënderbeu. Nëse vazhdojmë me këtë ide në kokë, atëherë kemi për të bërë shumë dhe për të ecur shumë. Ndoshta i vetmi pozicion i pamundur për t’u arritur për shkak të pikëve të shumta diferencë është ai i vendit të parë në renditje. Të gjitha pozicionet e tjera që të çojnë në Europë, përfshirë edhe Kupën e Shqipërisë jemi ende në garë dhe do të mundohemi ta arrijmë me çdo kusht.
Dita, gol dhe lojë e mirë përballë Kukësit. Cili është sekreti i kësaj rritjeje?
Puna dhe vetëm puna. Jam impenjuar maksimalisht, duke dhënë gjithmonë më të mirën time në çdo seancë stërvitore dhe në çdo ndeshje. Mund të them se çdo ekip e ka një periudhë negative apo një moment që gjithçka shkon keq. Për fat të mirë e mblodhëm veten pas shumë vuajtjesh dhe tashmë ka ardhur momenti ynë./Panorama Sport
