Një nga lajmet më të mira që solli ndeshja e së shtunës mes Spanjës dhe Norvegjisë, ishin kombinimet perfekte nga krahu i majtë mes Hordi Albës dhe Asensios. Një aksion i tillë solli edhe golin e parë të Rodrigo Morenos. Alba dhe Asensio kombinuan me njëri-tjetrin, mbivendosën pozicionet në mesfushë, shmangën disa herë kundërshtarët dhe mbi të gjitha, u dhanë ritëm aksioneve. Përveç golit, Alba dhe Asensio kombinuan bashkë edhe në minutën e 40-të, por aksioni u anulua.
Për më tepër, Asensio ishte shumë pranë golit dy herë. Dukej sikur Alba po luante me Lionel Mesin te Barcelona. Një dyshe e bukur. Gjithmonë kemi dëgjuar se mëngjarashët (ata që luajnë me këmbën e majtë) e shohin futbollin në një mënyrë ndryshe nga të tjerët dhe se teknika e tyre është më superiore. Duhet të theksojmë faktin që vetëm 10% e gjithë popullsisë në botë janë të majtë dhe ky proporcion është i tillë edhe në futboll. Prandaj, një skuadër futbolli nuk ka më shumë sesa 4 lojtarë të majtë në një formacion titullar, madje 3: një qendërmbrojtës, një mesfushor dhe një sulmues. Spanja e Luis Enrikes është e veçantë, sepse 10 nga 23 futbollistët që ka grumbulluar (44%) janë të majtë: Rodrigo, Asensio, Kanales, Saul, Bernat, Gaja, Alba, Martinez, Hermoso, Pau Lopez.
Me Lopeteguin në Botërorin e kaluar ishin vetëm 8 lojtarë të majtë. Problemet- 26 goditje në portë, 10 prej tyre në kuadrat, 4 të bllokuara nga mbrojtja e Norvegjisë për të shënuar dy gola. Statistikat janë shqetësuese dhe këtë e di mjaft mirë edhe trajneri Luis Enrike, i cili ka thënë se kombëtarja e tij nuk është agresive në zonën kundërshtare. Dhe realiteti e tregoi diçka të tillë. Problemi është edhe në lidhje me mbrojtjen, ku në 4 goditje të pësuara, formacioni i Spanjës pësoi një gol. 12 goditje për të shënuar 1 gol dhe 4 për të pësuar, është një shifër alarmante. Nga 25 ndeshjet e para të luajtura në eliminatoret e Europianit, Spanja kishte “nderin” të renditej e treta me goditjet në portë. 26 tentativat u superuan nga 31 të Greqisë dhe Qipros me rivalë si Lihtenshtejni dhe San Marino, ekipe shumë larg nivelit të Norvegjisë së Odegardit. Maqedonia gjithashtu goditi portën po aq sa Spanja përballë Letonisë. Shumë kombëtare të tilla u renditën poshtë Spanjës në këtë aspekt. Problemi lidhet me faktin që një kombëtare si Italia arriti të shënonte 2 gola me 11 goditje dhe Holanda me 10 goditje festoi 4 gola, ndërsa Anglia me 12 goditje shënoi 5. Efektiviteti në maksimum.
Për këtë duhet të punojë Spanja. Portugalia me 17, Kroacia me 22 apo Belgjika me 15 janë kombëtare që mund të krahasohen me Spanjën e Enrikes. Rodrigo Moreno ishte ai që e tentoi më shumë herë portën e Norvegjisë, duke goditur 7 herë, e dyta prej të cilave përfundoi në rrjetë. Një goditje më pak bëri Alvaro Morata, por rastet e tij ishin më të pastra sesa ato të sulmuesit të Valencias. “Është e vërtetë që do të më pëlqente të shënonim 50% të rasteve që shënuam dhe rezultati do të ishte më i thellë. E vetmja mënyrë është t’u japim besim sulmuesve që kemi në skuadër. Vështirësia në futboll lidhet me faktin kur nuk ke raste, por ne jemi të qetë sepse raste kemi pasur dhe duhet të punojmë për t’i dërguar në rrjetë”, tha Enrike pas ndeshjes./Boldnews.al/
