Jose Mourinho suksesin më të madh të tijin si trajner e realizoi në vitin 2010 kur arriti të fitonte tripletën me skuadrën e Interit, ekipin më të urryer të Juventusit, por sot, trajneri portugez e parashikon ekipin torinez në finale të Ligës së Kampionëve këtë sezon.
Mourinho pret një finale Juventus-Barcelona, ku deklaron se kanë përvojën, talentët dhe lojtarët e veçantë si Cristiano Ronaldo dhe Lionel Messi.
“Gjithkush flet për Cristiano Ronaldon dhe Messin, por unë preferoj të flas për Juventusin dhe Barcelonën”, tha portugezi për AFP.
“Unë e di që të gjithë fokusohen tek individët, por, duke qenë një trajner, e trajtoj futbollin si një sport kolektiv.”
“Barcelona dhe Juventusi janë dy kandidatët e mëdhenj për të fituar finalen, por kam edhe sytë në ekipet si Ajax dhe Porto”, përfundoi ai.
Kujtojmë se kur ishte trajner i Interit ai shprehej se kurrë nuk do ta drejtonte Juventusin dhe nëse do të ndodhëte ai do ishte çmendur.
