Një 35-vjeçar është ekzekutuar me armë zjarri në fshatin Grudë të Shkodrës. Viktimë mësohet se ka mbetur Ferdinant Polia nga Thethi.
Sipas një rindërtime paraprak të ngjarjes nga Policia e Shkodrës, 35-vjeçari ishte duke lëvizur me automjet kur ndaj tij është qëlluar disa herë me armë zjarri. Ferdinant Polia mbeti i plagosur dhe u transportua në spitalin Rajolal Shkodër, por nuk mundi të mbijetojë.
“Sot në ora 16.30, është dërguar në Spitalin Rajonal Shkodër shtetasi F.P, rreth 35 vjeç, i plagosur me armë zjarri. Megjithë përpjekjet për ti dhënë ndihmë mjekësorë ai ka ndërruar jetë. Ngjarja ka ndodhur në fshatin Grudë dhe sipas informacioneve të para dyshohet se është qëlluar me armë zjarri teksa po lëvizte me një automjet. Në vendngjarje ndodhet grupi hetimor po punon për sqarimin e rrethanave të kësaj ngjarje dhe identifikimin dhe kapjen e autorit/ve”, sqaron policia.
Viktima ka qenë i shoqëruar nga një person tjetër, i cili për fat të mirë nuk ka asnjë lëndim. Ai është marrë në pyetje nga grupi hetimor.
Në vendin e ngjarjes janë gjetur mbi 20 plumba. Ndërsa Policia ka gjetur tek Ura e Mesit një motor, të djegur që dyshohet se i përket autorit të vrasjes.
Ferdinant Polia ishte bashkëpronar i një bujtine në Theth. Disa muaj më parë, kur dëbora bllokoi Thethin, Polia ishte një nga banorët e Thethit që kërkonte publikisht investime për zonën.
/Boldnews.al/
