Nicolo Zaniolo (Roma) dhe Moise Kean (Juventus), që të dy 19-vjeçar, mund të debutojnë me fanellën e Kombëtares së Italisë.
Zaniolo dhe Kean kanë shkëlqyer me ekipet e tyre, Romën dhe Juventusin duke shtyrë kështu trajnerin, Roberto Mancini, t’i ftojë për herë të parë në ekipin A të Italisë.
Ish-trajneri i Inter, Manchester City e shumë klubeve tjera, doli në konferencë për media para ndeshjeve të kualifikueseve të “Euro 2020”, ku Italia do të përballet me Finlandën dhe Lihtenshtejnin.
Trajneri premtoi se Italia e tij do të bazohet te lojtarët e rinj si Zaniolo dhe Kean.
“Kam grumbulluar shumë sulmues sepse duhet të punojnë në atë drejtim. Më vjen keq për ata që mbeten jashtë”, tha fillimisht italiani.
“Të rinjtë – Zaniolo me siguri do të debutojë për ne. Kean ka fituar shumë për moshën që ka. Le të shpresojmë që të ketë të njëjtin start si Balotelli, i cili është shumë i zoti”, shtoi ai.
“Mesfusha? Kemi shumë lojtarë të mirë. Jorginho po luan mirë edhe pse Chelsea ka probleme, ai nuk ka humbur asnjë ndeshje. E njëjta gjë vlen edhe për Verratin”.
Mancini ka zbuluar edhe pse nuk i ka ftuar Belottin dhe Balotellin.
“Belotti? Gjithkush ka të drejtë në mendimin e vet. Kjo është bukuria e ekipit kombëtar. Por, unë marr vendimet e mia. Ai mund të bëhet edhe më i mirë sesa është dhe të kthehet në kombëtare”.
“Balotelli? Nuk është ende në formën optimale për të ardhur në kombëtare. I duhet edhe pak kohë, shtoi ai mes tjerash.
