Orges Shehi shprehet se Skëndërbeu është ende në garë për titullin kampion.
I ftuar në emisionin “Sport News Plus” të moderatores Daljana Sejdia në televizionin “News 24”, trajneri i Skënderbeut, Orges Shehi tha:
“Jemi në garë, nuk e kemi përjashtuar veten nga gara edhe pse kishim rezultate jo të mira, por na vjen mirë që jemi kthyer në garë me dy ndeshje të mira përballë dy rivalëve direkt.
Me Kukësin ishte një përballje ndaj dy rivalëve që këto vite i kanë vënë tonin futbollit shqiptar. Vinim pas një ndeshje të mirë me Teutën dhe kjo ishte ndeshja e duhur për t’u kthyer ku dëshirojmë, aty ku ishim në javët e para. Nuk ka më mirë sesa të kthehesh drejt objektivave të garës.
A ndihmuam Partizanin? Do ta quaja vetëm fitore për skuadrën, nuk ndalem fare te kundërshtarët. E thashë që pas ndeshjes që deri para tre ditësh na thoshin se luajmë për të mundur Partizanin, tani për t’i bërë favore. A jemi protagonistë? Po, prandaj jemi Skënderbeu, për të qenë protagonistë, pavarësisht se nuk kemi qenë në javët e fundit.
Na vjen mirë që jemi kthyer te fitorja, pavarësisht se kishim Kukësin përballë. Ecuria negative na ka goditur shumë. Na mungojnë shumë pikë. Ndoshta në fillim, kur u organizuam kishim objektiv për të qenë në 3 vendet e para, më pas oreksi na u shtua dhe patëm objektiva madhore. Besoj se tani jemi brenda objektivave. Do vazhdojmë të shohim përpara.
A ka ndikuar sinjali pozitiv i KAS-it? Duke qenë se po i afrohemi datës, vjen një karikim dhe mobilizim i gjithë skuadrës. Kjo shërben për pak motivim më shumë. Besoj se do shërbejë për anë pozitive.
Është një çështje që drejtuesit dhe avokatët po merren seriozisht. Është një çështje e ngritur kot. Jemi optimistë dhe besimplotë që këtë çështje do ta fitojmë. Ne kemi vetëm Zotin aleat. Unë kam 9 vite te Skënderbeu, jam si në shtëpi. Kemi arritur shumë suksese. Na bëhet qejfi kur skuadra shqiptare ecin në Europë. Kur Kukësi kaloi 3 ture në Europë, u bëmë të gjithë tifozë me Kukësin”, u shpreh Shehi.
