Ndërsa përfunduan protestën dhe u shpërndanë për në shtëpitë e tyre, dhjetëra qytetarë përfunduan në pranga, me justifikimin e policisë “ndalim për verefikim”. Pa asnjë provë nga prokuroria, policia nisi valën e ndalimeve, dhe procedimeve penale ndaj qytetarëve që ishin në shesh, mes të cilëve dhe ndaj sekretarit të përgjithshëm të Partisë Demokratike Gazment Bardhi. Skena të tilla u panë disa netë më parë në protestën e 16 shkurtit në Tiranë apo në Fier, kur forca policore përhapi terror te protestuesit që dolën në shesh. Për juristin Çlirim Gjata, aktualisht sekretar ligjor i Partisë Demokratike, ndalimet janë të paligjshme, janë prangosur të mitur, nuk u lanë kontaktet me avokatët. Ai bën të ditur se nën zë policët i kanë thënë se i është dhënë urdhër nga lart që të sillen në këtë mënyrë.
Gjata argumenton se ka shkelje të procedurës penale, të ligjit dhe kushtetutës.
Ndalimin e të riut nga Fieri, Bruno Baçi, e ndaluan vetëm sepse është i biri i ish deputetit Luan Baçi. Dhe kjo sipas Gjatës është bërë nga kryeministri në hakmarrje për protestat që demokratët zhvilluan në Fier gjatë vizitës së tij.
Në lidhje me procedimin ndaj sekretarit të përgjithshëm Gazment Bardhi, Gjata thotë se për të policia nuk ka asnjë provë, në të kundërt i duhet të procedojë apo arrestojë gjithë opozitën.
Në vlerësimin e Gjatës i cili i ka ndjekur zhvillimet ligjore politike dhe elektorale prej një kohë të gjatë, sjellje të kryeministrit me policinë dëshmojnë fundin e Edi Ramës. Duke iu referuar pranisë masive të mediave ndërkombëtare në Tiranë këto ditë, Gjata thotë se kjo ka ndodhur vetëm në ‘90 dhe në ‘89 në Rumani kur u eleminua Çausesku.
