Skënderbeu duket i plotë para ndeshjes me Kukësin dhe kjo bën që trajneri Orges Shehi të ketë disa alternativa për të hedhur në fushë formacionin më të mirë që ka në dispozicion. Me kthimin e Bregut të gatshëm, duket se situata në Korçë është përmirësuar mjaft. Dilema e vetme mbetet nëse korçarët do të luajnë nga minuta e parë me Bregun në fushë apo nuk do të sakrifikohet kaq shumë ylli vlonjat dhe do të hyjë si zëvendësues.
Për momentin, duket se plani i bardhekuqve është që Bregu ta nisë nga stoli dhe të marrë disa minuta në lojë e sipër në varësi të rezultatit. Shehi dukej i vendosur dje që në portë ta nisë me Dajsinanin dhe më pas Vangjeli e Abazi do të jenë në krahët e mbrojtjes, me Radasin dhe Pëllumbin që do të formojnë dyshen e qendrës. Nga ana tjetër, Taipi së bashku me Ditën dhe Sibon do të jenë pedanat në mesin e fushës që do të kujdesen për të organizuar lojën e Skënderbeut, ndërsa Muzaka i zhvendosur djathtas dhe Pervan majtas do të jenë në mbështetje të Krasniqit në repartin e avancuar. Kjo pak a shumë është vendosja e Skënderbeut në ndeshjen me Kukësin. /Panorama Sport/
