Të paktën tetë nxënës kanë vdekur dhe shumë të tjerë kanë mbetur nën rrënoja pasi një ndërtesë, në kuadër të së cilës ishte edhe një shkollë, është shembur në Lagos të Nigerisë.
Raportohet se në këtë shkollë e ndjekin mësimin më shumë se 100 nxënës.
Në pamjet e publikuara shihen ekipet e shpëtimit duke kërkuar trupa të njerëzve nën copat e shembura të betonit dhe metalit.
Ende nuk dihet shkaku i shembjes së kësaj ndërtese.
Ndërtesa e shembur përbëhej nga tri kate. Në të ishin disa banesa, ndërsa kati i tretë shfrytëzohej si shkollë.
Ekipet e emergjencës i kanë nxjerrë nga rrënojat disa fëmijë të lënduar. Ibrahim Farinloye, zëdhënës i Agjencisë për Menaxhimin e Emergjencave Kombëtare, ka thënë se shembja e ndërtesës ka ndodhur rreth orës 10 sipas kohës lokale.
“Besohet se shumë njerëz, përfshirë fëmijë, janë bllokuar nën rrënoja të ndërtesës”, ka thënë ai.
Shembjet e ndërtesave ndodhin shpesh në Nigeri për shkak të materialit të dobët ndërtimor dhe mungesës së zbatimit të rregulloreve të ndërtimit. Në vitin 2016, më shumë se 100 njerëz kishin vdekur nga shembja e kulmit të një kishe, shkruan “BBC”.
