Këto foto të trishtueshme tregojnë një vajzë të re të veshur me fustan të bardhë, e ulur në gjunjë pranë varrit të të fejuarit të saj, 3 javë pasi u qëllua për vdekje nga një person të cilit po i shiste një Xbox.
Kjo duhet të ishte fundjava më e bukur për 22-vjeçaren Sara Baluch, pasi do të martohej me të fejuarin e saj 24-vjeçar Mohammad Sharifi.
Të dielën ajo veshi fustanin që kishte zgjedhur për t’u kurorëzuar në martesë dhe u nis për në varreza, aty ky dashuria e jetës së saj prehej, jashtë Nashville në Tennessee.
Me lotët që i rridhnin pa pushim, 22-vjeçarja e dëshpëruar qëndroi mbi varr, ndërkohë që familjarët luteshin dhe lexonin Kuranin. “Duhet të ishim bashkë. Më vjen shumë keq Mohammad, më vjen shume keq“, ishin fjalët e së resë.
Teksa u përgatitën për t’u larguar nga varrezat nëna e Baluch, Sona, e zëvendësoi vellon e bardhë të vajzës me një të zezë.
Sharifi u qëllua për vdekje më 19 Shkurt, në parkingun e një kompleksi në Hixson, ku kishte shkuar për t’i shitur Xbox One, D’Marcus White, pasi kishte folur me të në Facebook Marketplace. 20-vjeçari u arrestua dhe akuzohet për vrasje.
Baluch ishte e para që mbërriti në spital pasi Sharifi ishte qëlluar. Kur pyeti stafin për dhomën në të cilën ndodhej i fejuari i saj, ata i thanë se nuk ishte në sistem. “Pata një parandjenjë shumë të keqe”, tha ajo për Times Free Press.
Pak minuta më vonë, një infermiere iu afrua dhe i dha të resë lajmin e hidhur. “Nuk ishte e drejtë. Ai më mbronte mua çdo ditë dhe unë nuk munda ta mbroja”, shtoi 22-vjeçarja.
