Nga Boldnews.al
Kastriot Skënderaj është emëruar këshilltar i Ardi Veliut, Drejtorit të Policisë së Shtetit, pas shkarkimit nga posti i Drejtorit të Policisë së Tiranës.
Një ditë më parë, Ministri i Brendshëm Sandër Lleshaj njoftoi përmes një postimi në Twitter, largimin nga detyra të Skënderajt. Lleshaj e justifikoi largimin e Skënderajt me sjelljen e policisë me banorët te “Petro Nini” në kryeqytet, ku pati përplasje mes efektivëve me uniformë dhe banorëve, të cilët refuzuat të dilnin nga banesat.
“Vendimi i kreut të Policisë së Shtetit për lirimin nga detyra të drejtuesit të Policisë së Tiranës është reagimi i duhur. Nuk mjafton që Policia të jetë ligjërisht në rregull. Prej saj kërkohet më shumë. Ajo duhet të jetë dhe me mendje e zemër në lartësinë që e kërkon ndjeshmëria dhe interesi i publikut. Jo si sot, tek rruga e shkollës ‘Petro Nini’”, shkroi Lleshaj.
Një ditë pas njoftimit të vendimit, për të cilin burime pranë Skënderajt bënë me dije se erdhi jo me dëshirën e tij, Boldnews mëson se ish-drejtori i Tiranës është emëruar nga Ardi Veliu këshilltar.
Përplasje në Polici ka pasur edhe për zgjedhjen e drejtuesit të përkohshëm të DVPT, me Dhimitraq Ziun që nuk pranoi komandimin Drejtor të Policisë së Tiranës, duke kërkuar emërim.
Ditët e fundit, kanë ndodhur disa lëvizje në kupolën e Policisë dhe të tjera ndryshime priten në vijim.
