Komisioni Qëndror i Zgjedhjeve, i ka dhënë mandatin e Alban Zenelit, kandidat nga lista e Partisë Demokratike në Kukës.
Alban Zeneli, ndonëse ka qenë ndër ata që kanë pranuar në bllok djegien e mandatit, dje u pendua dhe dorëzoi në KQZ formularin e dekriminalizimit, hap ky i ndjekur me dhënien e mandatit ditën e sotme.
Alban Zeneli, do të zëvendësojë Flamur Nokën në Kuvendin e Shqipërisë, për Qarkun e Kukësit.
KQZ është mbledhur që prej orës 14:00, ndërsa po zëvendësohen deputetët që kanë lënë mandatin.
Kujtojmë se më 21 shkurt, opozita vendosi djegien e mandateve në bllok, ndërsa dorëzuan dorëheqjen e tyre pranë Kryesisë së Kuvendit, të shoqëruar nga mijëra protestues. Ky vendim i opozitës, erdhi pas protestës së datës 16 shkurt, ndërsa si kryetari i PD-së, Lulzim Basha ashtu edhe kryetarja e LSI-së, Monika Kryemadhi, u shprehën se kjo ishte mënyra e vetme për të rikthyer ligjshmërinë në zgjedhje.
