Skënderbeu i këtij viti është aq i ngjashëm me atë të sezonit 2009- 2010. Asokohe shifrat ishin si mos më keq, por sërish mbijetuan. E megjithatë, edhe në këtë kampionat nuk po u ecën aspak mirë. Në 24 javë, bardhekuqtë kanë 10 fitore, 4 barazime dhe 10 humbje.
E thënë ndryshe, nga 72 pikë të mundshme kanë marrë 34 dhe lënë rrugës 38 të tjera. Dhe po të shohësh sezonet e fundit, vëren se kurrë nuk kanë qenë kaq “zi”.
Që prej 2010-ës e deri vjet, maksimumi e mbyllnin krejt kampionatin me 8 humbje, ndërsa tani e kanë kaluar kufirin pa u mbyllur mirë sezoni. I vetmi vit që kanë pasur më shumë disfata është postngjitjes në elitë (2009-2010), me 13 humbje në 33 javë.
– Sulmi i korçarëve nuk po shpërthen. Deri më tani kanë shënuar 26 gola, që përkthehen me një mesatarë prej 1.08 gol për ndeshje. Por më shumë se ofensiva, shqetëson prapavija. Kanë pësuar plot 23 gola dhe duhet thënë që mbrojtja fut “ujë”.
– Marko Radas nuk është aspak “fair”. Po të shohësh bilancin e kartonëve deri në këtë fazë të kampionatit, është ndëshkuar plot 11 herë, duke humbur praktikisht dy ndeshje. Nëse merr edhe një tjetër të verdhë, atëherë do të humbasë edhe një tjetër takim. Dhe po të shohësh krejt kartonët e marrë në të gjithë kampionatin, askush më shumë se ai dhe Behar Ramadani i Luftëtarit nuk marrin kaq shumë të verdhë. Sakaq, i gjithë ekipi ka marrë 40 të verdhë dhe dy të kuq (pas dy të verdhëve).
– Gati një “formacion” për golin. Po të shohësh shpërndarjen e rrjetave te Skënderbeu, vëren se janë 10 lojtarë që shënojnë. Bomberi vazhdon të jetë Dejvi Bregu, me 7 gola. Edhe pse u bë gati 3 muaj që nuk luan, vlonjatin nuk po e parakalon kush brenda ekipit.
Gjergj Muzaka është i dyti me 5 gola dhe Oto Xhon i treti, me dy më pak. Nga dy kanë Dita, Gripshi e Krasniqi, ndërsa shijen e golit e kanë provuar nga një herë edhe Vangjeli, Sibo, Pervan dhe ish-i Hoxhaj.
– Kristi Vangjeli është kampioni i minutave në Korçë (2070 në 23 javë) e megjithatë, as ai nuk është titullar i padiskutueshëm. Për shkak të verdhëve është detyruar që të humbasë vetëm një takim. Të gjitha ndeshjet i ka luajtur vetëm Nazmi Gripshi, por me montazh të reduktuar, 1660. Organika e Skënderbeut është e gjerë dhe ai deri më tani ka aktivizuar 22 lojtarë.
– Oto Xhon është zgjedhja e parë e Orges Shehit. Sa herë sheh nga stoli, trajneri vendos që të aktivizojë pikërisht sulmuesin nigerian. Dhe nuk ka ndodhur pak herë, por në 15 ndeshje.
– Në anën tjetër, Nazmi Gripshi vazhdon të mos i mbyllë ndeshjet. Edhe pse i nis si titullar, mesfushori është detyruar që të largohet 11 herë nga fusha.
