Në Komisionin e Sigurisë po shqyrtohet raporti vjetor i SHISH. Në hapjen e mbledhjes, Drejtori i SHISH, Helidon Bendo deklaroi se raporti i mbledhjes është tërësisht konfidencial dhe kërkoi zhvillimin e mbledhjes pa praninë e mediave, raporton Panorama.
Por deputeti socialist, Xhemal Qefalia kërkoi që nëse ndonjë pjesë e raportit nuk përmbante informacion të klasifikuar, ato të dhëna bëheshin në praninë e kamerave. Këtë kërkesë të Qefaliajt e mbështeti edhe kryetarja e Komisionit Ermonela Felaj e cila theksoi se e mbështet propozimin e deputetit të PS, meqë edhe dy deputet të komisionit, Elena Xhina dhe Adnor Shameti nuk janë të pajisur ende me certifikatë sigurie pasi sipas saj, edhe kjo kërkon kohën e vet.
Por drejtori i SHISH e hodhi poshtë propozimin e socialisteve duke theksuar se informacioni në raportimin vjetor është tërësisht konfidencial. Pas kësaj Felaj kërkoi largimin e mediave por jo të dy deputetëve që janë pa certifikate sigurie duke shkelur ligjin për informacionin e klasifikuar.
Dy deputetet e PS-së janë bërë anëtarë të Komisionit të Sigurisë që prej 10 ditësh dhe ende nuk janë pajisur me certifikatë sigurie ku sipas Ermonela Felaj kjo gjë kërkon kohën e saj, pasi DSIK ka procedurat e veta.
Nëse kthehemi pak në kohë, në fillim të muajit janar, DSIK pajisi me certifikate sigurie Gent Cakajn, Ministrin në Detyrë për Punët e Jashtme për 2 dite gjë e cila solli edhe dyshimet e Presidentit i cili kërkoi hetimin e kësaj procedure. /Panorama/
